В Атырау +35.5 
Бұл оқиға сәуір айындағы түнде «Авангард» ықшамауданында болған.
Екі жігіт аулада отырған жастардың қасында гитараны байқап қалады. Солардың бірі аздап ойнап көруге рұқсат сұрайды.
Бірақ ол өзінің шағын «концертін» аяқтай алмай қалды: аулаға полиция патрулі кіріп, түнгі тыныштықты бұзғаны үшін оған 10 812 теңге көлемінде айыппұл жазды.
Осы жерде оқиға бітуі мүмкін еді. Гитара иесі досымен үйіне қайтпақ болған, бірақ айыппұл алған жігіт шығынды өзі ғана төлеуді қаламаған сияқты. Ол жігіттерді қуып жетіп, «айыппұлды бөліп төлейік» деп ұсыныс жасайды. Оның ойынша, бәріне гитара себеп болғандықтан, иесі де жауапкершілікті бөлісуі тиіс еді.
Алайда бұл логика іске аспады: бас тарту алған соң екі студент гитара иесі мен оның досына тап берді. Бір жәбірленуші бетіне бірнеше соққы алды, екіншісін жерге құлатып, ұрып-соқты. Абырой болғанда, ауыр жарақат алған жоқ.
Сотта екі айыпталушы кінәсін мойындап, өкініш білдірді және жәбірленушілермен татуласты. Жәбірленушілер де оларды қатты жазаламауды сұрады.
Атырау қалалық соты №2 екі студентті ҚР ҚК 293-бабы 2-бөлігінің 1-тармағы («Топпен жасалған бұзақылық») бойынша кінәлі деп таныды. Әрқайсына үш жылға бас бостандығын шектеу жазасы тағайындалды.
Анастасия ШЕРСТЯНКИНА