В Атырау +24.4 
Ләззат Аренелла Алматыдағы «Chevron Direct Investment Fund Ltd.» қорының реинвестициялар жөніндегі менеджері болып тағайындалды, деп хабарлайды PetroCouncil.kz.
Ол жаңа лауазымындағы жұмысына осы жылдың тамыз айынан бастап кіріседі. Бұл қызметте Аренелла Джон Дорфельдті алмастырды.
Осы тағайындауға дейін ол Chevron компаниясының Хьюстондағы кеңсесінде Enterprise Optimization – Eurasia Lead лауазымын атқарған.
Компаниядағы қызмет еткен жылдары Ләззат Аренелла бірқатар жауапты лауазымдарды атқарды. Олардың қатарында Пермь бассейніндегі операторлық емес бірлескен кәсіпорындар мен роялти-жер активтерінің коммерциялық мәселелері жөніндегі менеджер, жаһандық сауда жөніндегі маман, сондай-ақ Chevron-ның халықаралық бөлімшелеріндегі басқа да қызметтер бар.
Оның Қазақстандағы теңіз білімін дамытуға қосқан үлесі ерекше атап өтіледі. Аренелла — Қазақстан теңіз академиясының негізін қалаушы. Оның жетекшілігімен еліміздегі алғашқы халықаралық деңгейде аккредиттелген теңіз оқу орны құрылды. Сондай-ақ ол Қазақстанның Халықаралық теңіз ұйымының «Ақ тізіміне» енуінде маңызды рөл атқарды.
Ләззат Аренелла — Қырғызстанда туып-өскен этникалық қазақ. Жасөспірім шағында толық стипендиямен АҚШ-қа қоныс аударған.
Ол Chevron компаниясына 2005 жылы қосылып, компанияның коммерциялық көшбасшыларды дамыту бағдарламасының алғашқы түлектерінің бірі болды.
Аренелла Колумбия университетінің магистрі дәрежесіне ие. Мамандығы — халықаралық энергетикалық менеджмент және қаржы.
Ол Қазақстанға Chevron компаниясындағы 20 жылдан астам халықаралық жұмыс тәжірибесімен оралып отыр. Осы уақыт ішінде ол Хьюстон, Сан-Рамон, Лондон, Мәскеу және Атырау қалаларында қызмет етті.
Оның кәсіби тәжірибесі мұнай мен газды өндіру және өңдеу, сауда операциялары, бизнесті корпоративтік дамыту, сондай-ақ Upstream және Midstream бағыттарын қамтиды.