В Атырау +28.2 
13 шілде күні Байқоңыр ғарыш айлағында Қазақстан Республикасы Премьер-Министрінің орынбасары, Жасанды интеллект және цифрлық даму министрі Жаслан Мәдиев АҚШ-тың Ұлттық аэронавтика және ғарыш кеңістігін зерттеу басқармасының (NASA) басшысы Джаред Айзекманмен жұмыс кездесуін өткізді.
Келіссөздер барысында тараптар қазақстандық-американдық ынтымақтастықты дамыту перспективаларын талқылап, ғарыш ғылымы, астрофизика, спутниктік технологиялар және Жерді қашықтықтан зондтау саласындағы бірлескен жобаларға ерекше назар аударды.
Сондай-ақ ғылыми ұйымдар мен университеттер арасындағы әріптестікті кеңейту, жоғары білікті мамандарды даярлау және коммерциялық серіктестікті дамыту мәселелері қаралды.
Жаслан Мәдиев NASA-мен серіктестіктің ұлттық ғылыми-технологиялық әлеует үшін стратегиялық маңызын атап өтіп: «Қазақстан NASA-мен нақты нәтижелерге бағытталған ұзақ мерзімді практикалық ынтымақтастық орнатуға мүдделі», – деді.
Кездесу қорытындысында тараптар диалогты жалғастыруға дайын екендіктерін растап, бейіндік командаларға практикалық әріптестік жоспарын әзірлеуді тапсырды.