В Атырау +28.2 
Президент Қасым-Жомарт Тоқаев Премьер-министр Олжас Бектеновті қабылдады. Үкімет басшысы Қазақстанның 2026 жылдың бірінші жартыжылдығындағы әлеуметтік-экономикалық даму қорытындылары туралы есеп берді.
Премьер-министрдің баяндауынша, алты айда елдің ЖІӨ өсімі 4,1 пайызды құрады, жылдық инфляция 10,3 пайыз деңгейінде тіркелді, ал экономикаға 9,5 триллион теңге инвестиция тартылды.
Tengrinews.kz Премьер-министрдің Мемлекет басшысына жасаған баяндамасындағы басты мәлімдемелерді жинақтады:
Ауқымды құрылыс пен мегажобалар
Астанада екінші әуежай салу және «Tarlan Astana» кешенінің екінші кезеңін іске қосу жоспарлануда.
Алматы тау кластерінде «Almaty SuperSki» курорты белсенді түрде салынып жатыр. Онда 60 шақырымдық трасса жасалады, бұл күніне 10 мыңға дейін туристі қабылдауға мүмкіндік береді. Іске қосу 2028 жылдың желтоқсанына жоспарланған.
Құрылыс саласында жыл соңына дейін рекордтық 20 миллион шаршы метр тұрғын үйді пайдалануға беру көзделіп отыр.
Әлеуметтік сала және ЖЭО
Үкімет әлеуметтік қолдаудың тәсілдерін өзгертуде. Тиімсіз әлеуметтік төлемдерді оңтайландыру есебінен жылына 800 миллиард теңгеден астам қаражатты үнемдеу жоспарланып отыр. Бұл ақшаны жұмысқа орналастыруды ынталандыруға бағыттауға уәде берілді.
Жылу беру маусымына ерекше назар аударылды. Бектенов 5 ЖЭО-ны критикалық «қызыл» қауіп аймағынан шығаруға мүмкіндік туғанын, тағы 3-еуі «жасыл» аймаққа ауыстырылғанын жеткізді. Қазіргі уақытта 9 энергоблок, 55 қазандық және 51 турбина жөнделіп жатыр, бұған 384 миллиард теңге бөлінген.
Цифрландыру және Жасанды Интеллект
Қазақстанда әлемдік IT-гиганттармен бірлесіп қуаттылығы 250 МВт болатын «Деректерді өңдеу орталықтарының (ДӨО) алқабы» ауқымды жобасы өрістетілуде. Оған тартылған шетелдік инвестиция көлемі қазірдің өзінде 10 миллиард доллардан асты.
Тоқаевтың жаңа тапсырмалары
Есепті тыңдаған соң Қасым-Жомарт Тоқаев үкіметке елдің даму қарқынын сақтап қалуды және өңірлерде әлеуметтік әрі инфрақұрылымдық нысандарды салудың ауқымды бағдарламасын іске асыруға дереу кірісуді тапсырды.
Президент бұл жоба қазақстандықтардың өмір сүру сапасын түбегейлі жақсартуы тиіс екенін атап өтіп, бұл ретте заманауи денсаулық сақтау нысандарын тұрғызуға ерекше екпін жасады.