В Атырау +21.1 
«Қазгидромет» РМК синоптиктері 9 шілдеге Қазақстан аумағының басым бөлігінде дауылды ескерту жариялады. Елдің көптеген өңірінде аптап ыстық сақталып, найзағай, екпінді жел және бұршақ жаууы күтіледі.
Мегаполистер
Алматы: 9 шілде күндіз аздаған жаңбыр жауып, найзағай ойнайды деп болжанып отыр. Таулы аудандарда (Медеу және Бостандық аудандары) қысқа мерзімді жаңбыр жауып, найзағай болуы мүмкін. Жел екпіні секундына 15–20 метрге дейін жетеді.
Шымкент: Күндіз солтүстік-шығыстан соғатын жел күшейіп, екпіні секундына 15–20 метрге дейін жетеді.
Аптап ыстық қай өңірлерде болады?
Қазақстанға қуатты ыстық толқыны келді. Кейбір өңірлерде ауа температурасы +40 градустан асады.
Қызылорда облысы: 9–13 шілде аралығында ауа температурасы +35…+40 градусқа дейін көтеріледі, ал облыстың оңтүстігінде +45 градусқа дейін жетеді. 9 шілде күндіз облыстың орталығы мен шығысында шаңды дауыл күтіледі.
Маңғыстау облысы: Ауа температурасы +35…+42 градус аралығында болады. Сонымен қатар, 9 шілдеде облыстың батысында, солтүстігінде және орталығында жаңбыр жауып, найзағай ойнап, бұршақ түсуі мүмкін.
Жамбыл облысы: Синоптиктер ауа температурасы +38…+39 градусқа дейін көтерілетінін болжайды. Ал 10 шілдеден бастап облыстың оңтүстігі мен орталығында аптап ыстық +40…+43 градусқа дейін күшейеді.
Түркістан облысы: Күндіз +37…+42 градусқа дейін қатты ыстық болады (9 шілдеде шамамен +40…+41 градус). Жел екпіні секундына 15–20 метрге дейін жетеді.
Алматы облысы мен Жетісу облысы: Күндіз ауа температурасы +30…+38 градус болады. 10 шілдеден бастап өңірлердің орталық бөлігінде +40…+42 градусқа дейін көтеріледі. Жетісу облысында желдің екпіні секундына 23–28 метрге дейін жетуі мүмкін.
Ұлытау облысы: Өңірдің басым бөлігінде ауа температурасы +35…+38 градус болса, облыстың оңтүстігінде +41 градусқа дейін көтеріледі.
Алдағы күндері Ақмола, Атырау, Ақтөбе, Қостанай, Солтүстік Қазақстан және Қарағанды облыстарында да +30…+38 градус аралығындағы аптап ыстық сақталады.
Найзағай, бұршақ және дауылды жел
Бірқатар өңірлерде аптап ыстықпен қатар қауіпті ауа райы құбылыстары да күтіледі.
Батыс Қазақстан облысы: 9 шілдеде жаңбыр жауып, найзағай ойнап, дауылды жел соғып, бұршақ түсуі мүмкін. Кей жерлерде нөсер жаңбыр жауады. Жел екпіні секундына 15–20 метрге дейін жетеді. Ауа температурасы +35…+36 градус болады.
Атырау облысы: Облыстың оңтүстігі мен шығысында қатты жаңбыр, найзағай, бұршақ және дауылды жел күтіледі. Желдің екпіні секундына 15–20 метрге дейін күшейеді.
Ақтөбе облысы: Найзағай, бұршақ және дауылды жел күтіледі. Түнде облыстың солтүстігі мен батысында қатты жаңбыр жаууы мүмкін. Ауа температурасы +35…+36 градусқа дейін көтеріледі.
Абай және Шығыс Қазақстан облыстары: Синоптиктер дауылды жел туралы ескертеді. Абай облысында күндіз жел екпіні секундына 23–28 метрге дейін жетіп, найзағай, бұршақ және дауылды жел күтіледі. Шығыс Қазақстан облысында да қатты жаңбыр, бұршақ, дауылды жел болып, желдің екпіні секундына 23–28 метрге дейін күшейеді.
Өрт қаупі жоғары
Ауа температурасының өте жоғары болуы мен желдің күшеюіне байланысты Қазақстанның басым бөлігінде, соның ішінде Павлодар, Қарағанды, Түркістан, Жамбыл, Алматы облыстарында, сондай-ақ Абай, Жетісу және Ұлытау облыстарында жоғары және төтенше өрт қаупі жарияланды.
Құтқарушылар тұрғындарды табиғат аясында отпен жұмыс істеуде барынша сақ болуға шақырады.