В Атырау +29.1 
Chevron компаниясына тиесілі мұнай танкері Қара теңізде дрондар шабуылына ұшырады. Ол Каспий құбыр консорциумы арқылы тасымалдауларға пайдаланылып келген. Бұл туралы Reuters агенттігіне екі дереккөз хабарлады.
Қазіргі уақытта кеменің жағдайы, ықтимал зақымдануы, зардап шеккендер және жүктеу кестесіне әсері туралы ресми ақпарат жоқ. Оқиға Қазақстанда назар аудартты, себебі танкер КҚК арқылы мұнай тасымалдаумен байланысты.
Каспий құбыр консорциумы – Қазақстан мұнайының негізгі экспорттық бағыты. Елдегі кен орындарынан алынған шикізат Новороссийск маңындағы теңіз терминалына жеткізіліп, одан әрі Қара теңіз арқылы танкерлермен тасымалданады.
Chevron Қазақстан мұнай саласында ерекше орын алады. Компания Атырау облысындағы Теңіз кен орнын игеретін «Теңізшевройл» ЖШС-нің операторы әрі ең ірі қатысушысы болып табылады. Chevron-ның ТШО-дағы үлесі 50 пайызды құрайды, сондай-ақ ол Қарашығанақ жобасына қатысады және Каспий құбыр консорциумының мүшесі.
Теңіз кен орны Қазақстандағы ең ірі мұнай кен орындарының бірі саналады, оның өнімдері КТК арқылы экспортталатын мұнайдың елеулі бөлігін құрайды. Сондықтан КҚК терминалына қатысы бар танкерлерге жасалған кез келген шабуыл Қазақстан мұнайының логистикасына қауіп ретінде қарастырылады.
Chevron танкеріне жасалған шабуыл Қара теңіздегі мұнай инфрақұрылымы мен кемелерге қатысты бірқатар оқиғалардың жалғасы болды. Бұған дейін, 2026 жылдың қаңтарында, дрондар КҚК терминалына бағытталған екі мұнай танкеріне соққы берген еді. Олардың бірі Chevron компаниясы жалдаған танкер болған.
Ол кезде Қазақстан АҚШ пен Еуропаға мұнай тасымалының қауіпсіздігін қамтамасыз етуге көмектесуді сұраған. Энергетика министрлігі «ҚазМұнайГаз», КҚК әкімшілігі және кеме иелерімен бірге экспорттың үздіксіздігін сақтау үшін шаралар қабылдап жатқанын мәлімдеген.
Соңғы айларда Қара және Азов теңіздерінде ресейлік отын логистикасына қатысты танкерлер мен кемелерге шабуылдар жиілеп кеткен. Reuters сондай-ақ Қырым бағытына жанармай тасымалдаған «көлеңкелі флот» танкерлеріне соққылар жасалғанын хабарлаған.
Қазақстан үшін басты мәселе – жаңа оқиғаның КҚК арқылы мұнай жөнелтуге және теңіз логистикасының құнына әсер етуі мүмкіндігі. Әзірге терминал жұмысының тоқтатылғаны немесе экспорт кестесінің өзгергені туралы ресми хабар жоқ. Алайда Қара теңіздегі қайталанған шабуылдар Қазақстан мұнайын экспорттау тәуекелдері тек құбыр инфрақұрылымында ғана емес, теңіз тасымалы кезеңінде де жиілеп отырғанын көрсетеді.