Жоғары аудиторлық палатаның жартыжылдық есебі: Мемлекет бюджетіне 128 миллиард теңге қайтарылды

Президент Қасым-Жомарт Тоқаев Жоғары аудиторлық палата төрағасы Әлихан Смайыловты қабылдап, ведомствоның биылғы алғашқы жартыжылдықта атқарған жұмысының қорытындысы туралы есепті тыңдады.

Әлихан Смайыловтың айтуынша, есепті кезеңде сомасы 5,8 триллион теңгені құрайтын 13 ірі мемлекеттік аудит жүргізілген.

Тексеру жұмыстары жекелеген өңірлердің жергілікті атқарушы органдарын, бірқатар мемлекеттік органдарды, денсаулық сақтау жүйесінің инфрақұрылымын және мынадай акционерлік қоғамдарды қамтыды:

• «Проблемалық кредиттер қоры»;

• «Аграрлық корпорация»;

• «Қазпошта»;

• «Ақтау теңіз порты».

Анықталған кемшіліктерді жою нәтижесінде мемлекет бюджетіне 128 миллиард теңге қайтарылды. Үкімет пен аудит нысандарына 35 ұсыным мен 413 нұсқама жіберілді.

Заңнамалық өзгерістер және бюджетті бақылау

Президенттің бюджет үдерісін жетілдіру жөніндегі тапсырмасын орындау аясында ұлттық заңнамаға Жоғары аудиторлық палатаның бастамасымен бірқатар өзгеріс енгізілді. Атап айтқанда:

• Макроэкономикалық болжам қалыптастырудың жаңа ережесі қабылданыды;

• Мемлекет қаражатын жұмсауға қатысты қазыналық бақылау күшейтілді;

• Төртінші тоқсанда бюджетке түзету енгізуге тыйым салынды.

Сонымен қатар Мемлекет басшысына жекешелендіру үдерісінің ашықтығы мен тиімділігін арттыру шаралары, сондай-ақ агроөнеркәсіп кешенін реттеу тетігін жетілдіру жөнінде мәлімет берілді.

Биыл екінші жартыжылдықта 20 мемлекеттік аудитті аяқтау жоспарланған. Оның төртеуі Мемлекет басшысының тікелей тапсырмасы бойынша қолға алынған. Олардың аясында мыналар тексеріледі:

• Шымкент қаласы, Қарағанды және Шығыс Қазақстан облыстары;

• Фармацевтикалық өнім өндірушілерді қолдау тетіктері.

Бұдан бөлек, газ бен инвестиция салалары, «Жасыл даму» АҚ, «ҚазАвтоЖол» ҰК» АҚ қызметі, жекелеген ұлттық жобалар мен «Ауыл – ел бесігі» жобасы тексеруден өтпек. 

Сондай-ақ Жаңа Құрылтаймен өзара іс-қимыл аясында 2027-2029 жылдарға арналған республикалық бюджет жобасы бағаланады.

Кездесу соңында Президент заманауи цифрлық шешімдер мен жасанды интеллект технологияларын енгізуге басымдық бере отырып, мемлекеттік аудит жүйесін жетілдіру жөнінде бірқатар тапсырма жүктеді.