В Атырау +24.8 
Астанада 5 шілде күні өткен ауқымды дрон-шоуды ұйымдастырушылар елорда тұрғындары мен қонақтарынан кешірім сұрады. Қала күнінде жағалауға жиналған халық мерекелік қойылымның орнына коммерциялық жарнама көрсетілгеніне қатты ренжіп, көңілдері қалған, деп жазады Сыбайлас жемқорлықты тергеу қор-бюросы.
Іс-шара қарсаңында әлеуметтік желілер мен БАҚ-та «жаздың ең қызықты оқиғаларының бірі» болады деп жарнамаланған еді. Жұртшылыққа түнде жүздеген жарқыраған дронның көмегімен елорданың басты нышандары бейнеленеді деп уәде берілген. Мыңдаған адам ең жақсы орындардан тамашалау үшін Атырау көпірі маңына алдын ала жиналған.
Алайда, сүйікті қаласына арналған құттықтаулардың орнына көрермендер аспаннан «Freedom Ticketon» компаниясының үлкен логотипін және испаниялық әнші Энрике Иглесиастың алдағы концертінің таныстырылымын көрді.
Қазнетте бірден наразылық толқыны көтерілді. Желі қолданушылары бұл шоуды «мереке орнына жасалған бес минуттық жарнама» деп атап, ұйымдастырушыларды халықтың үмітін ақтамады деп айыптады.
Кінәлі кім?
Сынның астында қалғаннан кейін, шоуды ұйымдастырушы «Aspan Galaxy» компаниясының директоры Сымбат Серік мән-жайды түсіндіруге асығып, ресми түрде кешірім сұрады. Оның айтуынша, бұл шоу басынан бастап таза жеке коммерциялық жоба ретінде жоспарланған және Елорда күнін мерекелеудің ресми бағдарламасына мүлдем енбеген.
Ұйымдастырушылар БАҚ-қа бұл шараның жарнамалық сипатта болатыны туралы ақпаратты алдын ала жолдағанын айтып ақталды. Бірақ кейбір пабликтер мен басылымдар мұны жалпықалалық мерекенің бір бөлігі ретінде көрсеткен. Сымбат Серік бұл көріністі ұйымдастыруға Астана әкімдігінің де, «Freedom Ticketon» компаниясының де қатысы жоқ екенін қадап айтты.
Өз кезегінде, Иглесиас концертінің билет операторы «Freedom Ticketon» компаниясы астаналықтардың бұл қатал реакциясын ескеретінін мәлімдеді. Компания болашақта коммерциялық пиар мен жалпыхалықтық мереке араласып кететін мұндай келеңсіздіктерге (факап) жол бермеу үшін серіктестерімен бұл мәселені егжей-тегжейлі талқылауға уәде берді.