В Атырау +31 
Суданның солтүстігінде алтын өндіретін кеніштің опырылуы салдарынан 15 адам қаза тауып, бір адам жарақат алды, деп хабарлайды АА.
Суданның минералдық ресурстар компаниясы хабарлағандай, оқиға Вади-Хальфа округіндегі Самна ауданында орналасқан Мохамед Тауфик атындағы алтын кенішінде болған.
Компания оқиға орнына жедел түрде далалық бригадаларды жіберді. Жергілікті билік пен құтқару бөлімшелері іздестіру-құтқару жұмыстарын жүргізіп жатыр.
Алдын ала мәліметтерге сәйкес, трагедияның себебі – кейбір жұмысшылардың барлық ескертулерге қарамастан, қауіпсіздікке байланысты жабылған кенішке өз бетімен кіруі.
Компанияның экология және өнеркәсіптік қауіпсіздік департаменті бұған дейін кеніште опырылу қаупі жоғары екенін айтып, жұмысты тоқтату және нысанға кіруге қатаң тыйым салу туралы нақты ескерту жасаған. «Алайда кейбір шахтерлер бұл талаптарды бұзып, учаскеге кіргеннен кейін рудниктің бір бөлігі опырылып түсті», — делінген ресми мәлімдемеде.
Суданның дәстүрлі немесе шағын ауқымды алтын өндірісі секторында 2 миллионнан астам адам жұмыс істейді, ол елдегі алтын өндірісінің шамамен 80%-ын қамтамасыз етеді. 2011 жылы Оңтүстік Судан тәуелсіздік алғаннан кейін ел мұнай кірістерінің едәуір бөлігінен айырылды, сондықтан алтын Судан үшін шетел валютасының ең маңызды көздерінің біріне айналды.