В Атырау +25.3 
Футболдан әлем чемпионатында ширек финалдың тағы бір жұбы анықталды. Ойын күні барынша драмалық оқиғаларға толы болды: жанкүйерлер Криштиану Роналдудың көз жасына куә болды, бас бапкердің бірден қызметінен кету туралы мәлімдемесін естіді және Дональд Трамптың қатысуымен болған саяси даудың өршуін бақылады, деп хабарлайды Би-би-си.
Пиреней түбегінің қос құрамасы арасындағы кездесуде Испания Португалияны 1:0 есебімен жеңді. Матч өте тартысты өтті, ал қосымша уақытта жеңіс голын жартылай қорғаушы Микель Мерино соқты. Осы жеңістің арқасында «Қызыл фурия» 2010 жылғы жеңісті әлем чемпионатынан бері алғаш рет ширек финалға жолдама алды.
Португалия үшін бұл жеңіліс нағыз соққы болды. Финалдық ысқырықтан кейін команданың 41 жастағы капитаны Криштиану Роналду эмоциясын жасыра алмай, алаңда көз жасына ерік берді. Аңыз футболшы үшін бұл әлем чемпионаттарындағы соңғы матч болуы әбден мүмкін. Мұнымен тосын жайттар аяқталған жоқ: матчтан кейінгі баспасөз мәслихатында Португалия құрамасының бас бапкері Роберто Мартинес қызметінен кететінін ресми түрде жариялады.
Ойын күнінің екінші матчында Бельгия АҚШ құрамасын 4:1 есебімен сенімді түрде жеңді. «Қызыл әзәзілдер» қарсыласының қорғанысын тас-талқан етті: Шарль де Кетеларе дубль авторы атанса, Ханс Ванакен мен Ромелу Лукаку да бір-бір голдан соқты. АҚШ сапында Малик Тилльман жұбаныш голының авторы болды. Осылайша, турнирді қабылдаушы соңғы ел де кубок үшін күрестен шығып қалды.
Айта кетейік, АҚШ пен Бельгия арасындағы матчтың айналасында үлкен дау туындады. Ойын қарсаңында ФИФА америкалықтардың жұлдызды шабуылшысы Фоларин Балогунға берілген автоматты дисквалификацияны күтпеген жерден алып тастады. Ол алдыңғы кездесуде қызыл қағаз алған болатын. Кейінірек бұл іске саясат араласқаны белгілі болды. АҚШ президенті Дональд Трамп ФИФА президенті Джанни Инфантиномен телефон арқылы сөйлесіп, шабуылшыны «кешіруді» сұрағанын жеке өзі растады. Алайда Балогунның алаңға шығуы да АҚШ құрамасын ірі жеңілістен құтқара алмады.
Әлем чемпионатының ширек финалында Испания мен Бельгия өзара кездеседі. Турнирдің барысы мен ең қызықты жаңалықтарды Tengri Sport-тен бақылап отырыңыз.