В Атырау +28.2 
АА хабарлауынша, Уэльс тұрғыны Лоури Денманның миынан 38 паразит анықталған.
Бұл инфекцияға ол 2007 жылы Үндістанға жасаған үш айлық сапар кезінде шошқа етінен жұққан болуы мүмкін деген болжам бар.
Алғашқы белгілер 2010 жылы байқалған: әйелдің нәжісінен ұзындығы шамамен бір метр болатын таспа құрт шыққан. Кейіннен қатты бас аурулары басталып, 2011 жылы алғашқы эпилепсиялық ұстама тіркелді.
Миын сканерлеу нәтижесінде онда ондаған паразит бары анықталды. Оған қарсы дәрілер мен стероидтар қолданылғанымен, жағдайы қайта нашарлап, ол нейропсихиатриялық ауруханада алты апта емделді. Бұл кезеңде қатты мазасыздық, үрейлі ұстамалар және психоз белгілері байқалған.
Инфекционист дәрігер Брендан Хили бұл оқиғаны Ұлыбритания мен АҚШ мамандары зерттегенін атап өтті. Оның айтуынша, мұндай жағдай өте сирек кездеседі, сондықтан көптеген мамандар мұнымен бүкіл кәсіби өмірінде бетпе-бет келмейді.
2017 жылдан бері Денманда ұстамалар қайталанбаған. 2022 жылы ол қайтадан жұмысқа оралғанымен, өмір бойы эпилепсияға қарсы дәрілер қабылдауға мәжбүр.