В Атырау +23.1 
Өткен аптада ғана қызметінен кеткен Жасанды интеллект және цифрлық даму бұрынғы вице-министрі Дмитрий Мун бизнес саласына ауысты. Ол жаңадан құрылған Q.AI технологиялық компаниясының атқарушы директоры болып тағайындалды. Бұл туралы Tengrinews.kz хабарлады.
Бұл тағайындау туралы отандық жасанды интеллект технологияларын дамытуға арналған семинарда белгілі болды. Digitalbusiness.kz порталы жазғандай, жаңа құрылым елдегі жасанды интеллект жүйесінің қозғаушы күшіне айналуы тиіс.
Бұл қандай компания және немен айналысады?
Q.AI жобасы — Қазақстан мен осы салаға маманданған халықаралық «01.AI» корпорациясының бірлескен ірі кәсіпорны. Компания негізінен отандық өнімдерді шығарумен айналысады.
Дмитрий Мунның командасына мынадай міндеттер қойылды:
Қазақстанның тіл, мәдениет және заң ерекшеліктеріне сай ірі тіл модельдерін (LLM) жасау;
Күнделікті жұмыстарды автоматтандыратын арнайы ЖИ-көмекшілерді оқыту;
Бизнес пен мемлекеттік сектор үшін күрделі ЖИ-жүйелерін әзірлеу.
Семинарға қатысқан Премьер-министрдің орынбасары – Жасанды интеллект және цифрлық даму министрі Жаслан Мәдиев бұл саланың басты шартын атап өтті:
«Жасанды интеллектіні сәтті енгізу тек технологияға ғана емес, басшылардың бұл жаңа құралдарды күнделікті жұмыста қолдануға дайындығына да байланысты».
Дмитрий Мун туралы не белгілі?
Дмитрий Мун вице-министр қызметінен жақында ғана, яғни 2026 жылғы 22 маусымда кеткен болатын.
Цифрландыру саласындағы мемлекеттік қызметте 7 жыл тәжірибесі бар.
Вице-министр болған бір жарым жылда елдегі ЖИ саласының негізін қалаумен айналысты.
Оның қатысуымен Цифрлық кодекс пен Жасанды интеллект туралы заң жобасы әзірленді.
Ол тұста елде отандық суперкомпьютер іске қосылып, әлемдегі ең қуатты 100 есептеу машинасының қатарына енді.
Енді бұрынғы вице-министр осы жинаған тәжірибесін жаңа бірлескен кәсіпорында ЖИ өнімдерін дамыту үшін қолданбақ.