В Атырау +19.2 
Ақтөбеде жеке сот орындаушылары палатасының жетекшісі Манап Ниязбаевқа қатысты жанжал шықты. Әділет департаменті жоспарлы тексерістен кейін оның лицензиясын сот арқылы тоқтатуға қол жеткізді, деп хабарлайды hronika.kz.
Тексеру барысында Ниязбаевтың ірі қарыздары бар азаматтарға жазадан жалтаруға көмектескені анықталды. Ол есепшоттарды бұғаттап, елден шығуға тыйым салудың орнына миллиондаған қарызы бар адамдардың шетелге еркін шығуына жол берген.
Мысалы, бір борышкер Ресейге еш кедергісіз барып жүрген, ал сот орындаушысы істі жауып тастаған. Тағы бір әйел 4 миллион теңгеден астам қарызы бола тұра Шарм‑эш‑Шейхке демалуға кеткен. Басқа борышкерге бастапқыда елден шығуға шектеу қойылғанымен, кейін ол заңсыз түрде алынып тасталған. 2019 жылдан бері 700 мың теңге қарызды өндіріп алу ісі мүлде қозғалыссыз жатқан.
Сонымен қатар, Ниязбаев борышкерлердің есепшоттарынан ақша шешіп алған, бірақ ол қаражаттың қайда кеткені белгісіз. Электрондық жүйеде бұл қаржының бөлінуі туралы міндетті қаулылар болмаған. Кейбір жағдайда борышкерлердің ресми жалақысы болғанымен, ол құжаттарды ұстап қалуға жібермеген. Тіпті бір азаматтан бір қарызды екі рет өндіріп алғаны анықталды.
Сотта Манап Ниязбаев өз кінәсін мойындамай, істі тоқтатуды талап етті.
Алайда Ақтөбе қалалық соты Әділет департаментінің талабын қанағаттандырып, оны лицензиясынан айырды. Бұл шешім әзірге заңды күшіне енген жоқ және апелляцияға берілмек.