В Атырау +19.2 
Атырау мұнай өңдеу зауыты (АМӨЗ) жоспарлы жөндеуге жабылмас бұрын, Қазақстанда мұнай өнімдерінің жеткілікті қоры жасақталды. Бұл туралы «ҚазМұнайГаз» басқарма төрағасы Асхат Хасенов мәлімдеді, деп жазады QOS Live.
Оның айтуынша, жөндеу жұмыстары кезінде Атырау зауыты өңірлерге жанармайды үзіліссіз, қалыпты режимде жөнелтіп отырады.
Хасенов елдегі жанармай қорына қатысты нақты цифрларды атады:
«Қазір Қазақстанда бензиннің де, дизель отынының да 30 күндік қоры бар. Мұнай өнімдерінің негізгі түрлері ел бойынша толық жеткілікті», - деді ол.
Атырау зауытының үлесі қандай?
Асхат Хасенов Атырау зауытының ішкі нарықтағы орны ерекше екенін атап өтті. Елдегі жанармай өндірісінің шамамен үштен бір бөлігі осы зауытқа тиесілі. Қазақстандағы үш негізгі зауыттың (Атырау, Павлодар және Шымкент) қуаты бір-бірімен шамалас.
Тапшылық бола ма?
Жанармай бекеттерінде тапшылық немесе іркіліс бола ма деген сұраққа компания басшысы нақты жауап берген жоқ. Ол өз жауапкершілік аймағын бөліп көрсетті.
Хасеновтің айтуынша, «ҚазМұнайГаз» тек жанармай өндіруге және зауыттардың тоқтаусыз жұмыс істеуіне жауапты. Ал дайын өнімді нарыққа таратумен басқа құрылымдар айналысады.