В Атырау +23.9 
Қашағандағы газ өңдеу зауытының құрылыс алаңында қарлығаштар ұя салып, балапан шығарды.
Кәсіпорын қызметкері Әсел Санабаева әлеуметтік желіде суреттерін жариялап, құстардың құрылыс нысанының астына қоныстанғанын хабарлады.
«ГӨЗ құрылысында жұмыс істеймін, бүгін тосын жағдайды білдім. Құстар ғимараттың конструкцияларының астына ұя салған екен», — дейді ол.
Қазақ халқы үшін қарлығаш — ерекше құс. Ежелден бері ол ұя салған жерге құт-береке, бақыт келеді деп сенген. Сондықтан құрылысшылар мен басшылық бұл оқиғаны «жақсы ырым» ретінде қабылдап отыр.
Экологиялық тексеру барысында мамандар 13 белсенді ұяны анықтап, олардың барлығы бақылауға алынды. Қазір құрылыс техникасының арасында құстардың шырылы естіліп, экологтар олардың жағдайын қадағалауда.
Әсел Санабаева: «Бұл жерде қазір қарлығаштар мамандардың бақылауымен балапан шығарып жатыр», — деп атап өтті.
Оқиға қызметкерлер мен басшылықты ерекше толғандырды. Тіпті құрылыс алаңының бір бөлігін құстарға арнап атау ұсынысы да қарастырылуда. Бұл — адам мен табиғаттың ерекше көршілестігін еске салатын белгі болмақ.
Маусым аяқталған соң мамандар қайта тексеру жүргізіп, әрі қарайғы шараларды анықтайды. Ал әзірге қарлығаштар осы құрылыс алаңының бейресми символына айналған.