В Атырау +31.6 
Қазақстан Энергетика министрлігі Орынбор облысындағы газ өңдеу зауытына жасалған дрон шабуылына қатысты түсініктеме берді.
Ведомство мәліметінше, бұл жағдай Қазақстан тұтынушыларына тауарлық газ жеткізу тұрақтылығына әсер еткен жоқ.
Министр кеңесшісі әрі ресми өкіл Әсел Серікпаева диспетчерлік қызметтер логистиканы жедел түзеткенін айтты.
«Газдың қарсы көлемдері баламалы бағытпен жеткізілуде. Қажетті отын басқа көздерден үздіксіз толықтырылып отыр», — деді ол.
Энергетика министрлігі газ инфрақұрылымы қалыпты режимде жұмыс істеп тұрғанын, ішкі нарық толықтай энергия ресурстарымен қамтамасыз етілгенін атап өтті.
«Жағдай министрлік пен ұлттық оператордың тұрақты бақылауында», — деп қосты Серікпаева.
Бұған дейін Орынбор облысында газ өңдеу зауытына украин дрондары шабуыл жасағаны хабарланған. Аймақ басшысы Евгений Солнцев бірнеше дронның зауыт үстінде атып түсірілгенін мәлімдеген. Оқиға орнында төтенше қызметтер жұмыс істеп жатыр.
Еске сала кетейік, Орынбор газ өңдеу зауыты табиғи газ бен газ конденсатын өңдейді. Оның бір бөлігі Қазақстандағы Қарашығанақ кен орнынан жеткізіледі.