Алматыда Zeekr жүргізушісі 10 жылға сотталды

Алматыдағы Әл‑Фараби даңғылында болған қайғылы жол апаты бойынша сот шешімі жарияланды.

22 маусымда мамандандырылған ауданаралық қылмыстық істер соты Zeekr көлігінің жүргізушісін ҚР Қылмыстық кодексінің 345‑1-бабының 4-бөлігі бойынша кінәлі деп таныды.

Үкімнің мазмұны

• 10 жыл бас бостандығынан айыру, жазаны минималды қауіпсіздік мекемесінде өтеу.
• Қамаудағы уақыт жазаның мерзіміне қосылады (бір күн екі күн болып есептеледі).
• Көлік жүргізу құқығынан өмір бойына айырылды.
• Жәбірленушінің азаматтық талабы ішінара қанағаттандырылып, марқұм қыздың әкесіне 10 млн теңге өндірілді.
• Үкімді судья Еркін Майшинов жариялады.

21 наурыз түні Zeekr көлігі қарсы жолаққа шығып, Mercedes‑пен соқтығысқан. Салдарынан Mercedes жүргізушісі мен екі жолаушысы оқиға орнында қаза тапты.

Айыпталушы кінәсін мойындап, қайғылы жағдайға байланысты кешірім сұрады. Кейбір жәбірленушілер айыпталушымен татуласқанын айтып, бас бостандығынан айырусыз жаза тағайындауды сұраған. Алайда прокурор 10 жыл бас бостандығынан айыруды талап еткен болатын.