​Каспийдегі төтенше жағдай: теңізде мұнай төгілді

Каспий теңізінде су асты құбырының зақымдануы салдарынан мұнай төгілді. Төтенше жағдай Әзірбайжан секторында орын алды, деп хабарлайды SOCAR компаниясының баспасөз қызметі.

Ластану іздері мен ірі мұнай дағы танымал Дюбенди жағажайының маңынан табылды. Бірінші болып «Азнефть» өндірістік бірлестігінің бейінді қызметтерінің мамандары дабыл қақты.

Белгілі болғандай, мұнайдың ағу көзі су асты құбыры болып шықты. Алдын ала нұсқа бойынша, ол сырттан зақымдалған.

«Тексеру барысында мұнай дағы анықталды. Алдын ала мәліметтер бойынша, құбыр зәкірдің (якорь) соғуынан зақымдалған», — деп хабарлады компаниядан.

Қазір апаттық тармақ бойынша шикізат тасымалдау толықтай тоқтатылды. Экологиялық салдарды жою және жөндеу жұмыстарын жүргізу үшін жедел штаб құрылды. Жұмысқа Әзірбайжан ТЖМ күштері жұмылдырылған. SOCAR компаниясы «жағдай бақылауда» екенін баса айтты.