В Атырау +33.5 
Қала тұрғындары компьютерлік томографияны ұзақ күтетіндеріне шағымдануда. Олардың айтуынша, облыстық аурухананың пациенттерін қазір тәулік бойы облыстық балалар ауруханасына тексеріске жеткізуде, соның салдарынан медициналық мекеме алдында жедел жәрдем көліктерінің кезегі пайда болған.
Қала тұрғындарының айтуынша, кейбір науқастар өз кезегін тіпті жедел жәрдем көліктерінде күтуге мәжбүр, арасында ауыр халдегі адамдар да бар.
Бұл жағдайға Атырау облыстық ауруханасының директоры Ербол Иманғалиев түсініктеме берді. Оның сөзінше, мәселе ауруханада жүргізіліп жатқан күрделі жөндеумен байланысты.
— Күрделі жөндеуге байланысты облыстық ауруханада екі компьютерлік томография аппараты уақытша істемей тұр. Сондықтан барлық науқастарды жасалған келісім бойынша облыстық балалар ауруханасына жіберіп отырмыз. Кезекші дәрігерлер тәулік бойы, 24/7 жұмыс істейді, — деді Ербол Иманғалиев.
Осылайша облыстық аурухана пациенттеріне компьютерлік томография облыстық балалар ауруханасында жасалуда. Алайда тұрғындардың айтуынша, жүктеменің артуына байланысты тексеру кезегін күту уақыты едәуір ұзарып кеткен.
Жөндеу жұмыстарының нақты аяқталу мерзімі мен облыстық аурухананың өз томографтарының қайта іске қосылатын уақыты әзірге белгісіз.
Айгүл МАНСУРОВА