В Атырау +21.6 
Қазақстан мен Франция бірегей Балқаш көлін сақтап қалу үшін күш біріктірді. Екі елдің сарапшылары 2040 жылға дейінгі кезеңде су айдынының болашағын айқындайтын ауқымды Бас жоспарды әзірлеуде.
Астанада Қазақстан Республикасы Су ресурстары және ирригация министрлігі, Француз даму агенттігі және Францияның Геологиялық және тау-кен зерттеулері бюросы қатысуымен ашық кеңес өтті. Жиында ауқымды зерттеудің алғашқы нәтижелері талқыланды. Француз ғалымдары елордаға Балқаш-Алакөл бассейнінің гидрологиясы, ауыл шаруашылығы, мұздықтардың еруі және жерасты сулары бойынша әзірлемелерін ұсынды.
Климаттың өзгеруі жағдайында Балқашты не күтіп тұр?
Жобаның басты мақсаты — климаттың қарқынды өзгеруі жағдайында көлдің нәзік экожүйесін сақтап қалудың жолдарын анықтау. Француз мамандары заманауи цифрлық технологияларды пайдалануды ұсынды. Арнайы модельдеу арқылы олар өзен ағынын болжай алады және алдағы онжылдықтарда Балқашқа еріп жатқан мұздықтардан қанша су келетінін есептейді.
Талқылауға министрліктер мен экологтар ғана емес, сондай-ақ Қазгидромет, География институты өкілдері және ірі бизнес құрылымдары, соның ішінде Қазақмыс корпорациясы қатысты. Ғалымдар жиналған барлық деректерді Балқаштың су жинау алабының қазіргі жағдайын көрнекі түрде көрсететін бірыңғай жүйеге біріктірді.
Құтқару жоспары қашан дайын болады?
Бас жоспарды әзірлеуді толық аяқтап, оны жұртшылыққа 2026 жылдың соңына дейін ұсыну жоспарланып отыр.
«Су ресурстары ақпараттық-талдау орталығы» КЕАҚ басқарма төрағасы Қайратғали Хайрулланың айтуынша, француз әріптестерінің сапары алдағы қадамдарды нақты айқындауға мүмкіндік берді.
«Су шаруашылығы жағдайының 2040 жылға дейінгі даму болжамдарын әзірлеу, климаттық модельдерді таңдау және қосымша зерттеулер жүргізу сияқты Бас жоспарды дайындаудың келесі кезеңдері нақтыланады. 2026 жылдың соңына дейін қазақстандық және француз сарапшыларының бірлескен жұмысы жалғасады. Бұл Бас жоспар Балқаш көлінің экожүйесін сақтауға бағытталған ұзақ мерзімді шешімдерді қабылдаудың ғылыми негізіне айналады», — деп атап өтті Қайратғали Хайрулла.
Қазіргі уақытта ғалымдар әзірлеп жатқан цифрлық құралдар мен су ресурстарын бөлу сценарийлері мемлекетке дәл әрі тиімді басқарушылық шешімдер қабылдауға және Азиядағы ең ірі көлдердің бірі саналатын Балқашта экологиялық апаттың алдын алуға көмектеседі.