В Атырау +26.3 
Ресейдің Омбы облысында толық масштабты соғыс басталғалы алғаш рет ракеталық қауіп туралы ескерту жасалды. Бұл туралы ASTRA жергілікті тұрғындарға сілтеме жасап хабарлады.
Басылым дерегінше, аймақ тұрғындарына SMS-хабарламалар арқылы ракеталық қауіп туралы ескертілген. Омбы облысының губернаторы Виталий Хоценконың мәліметінше, режим шамамен жарты сағатқа созылған.
Сонымен бірге кейбір тұрғындар мүлде ескерту алмаған немесе тек қауіптің тоқтатылғаны туралы хабарлама алған.
Омбы облысы Украинадан шамамен 2350 шақырым қашықтықта орналасқан және Қазақстанмен шектеседі. Басылым бұл жағдайды украин дрондары мен ракеталарының ұшу қашықтығының кеңеюімен байланыстырады.
Bloomberg агенттігі бұған дейін украин дрондарының мүмкіндіктерінің артуы Ресей аумағындағы ықтимал соққы аймағын кеңейткенін жазған. Агенттік дерегінше, бұл аймаққа елдің елеулі бөлігі мен халқы кіруі мүмкін.
Соңғы айларда шабуылдар майдан шебінен алыс аймақтарда да тіркелген. Олардың қатарында Челябинск, Екатеринбург, Пермь және Чебоксары бар.