В Атырау +28.5 
Алматыда «Webcom Kazakhstan» ЖШС-нің бұрынғы жетекшісі Евгений Горожанкиннің ісі бойынша үкім шықты.
Михаил Козачковтың хабарлауынша, компания қазақстандық тапсырыс берушілер үшін Facebook, Яндекс, Google және TikTok сияқты ірі цифрлық платформаларда интернет-жарнама орналастырумен айналысқан. Клиенттердің қатарында құрылыс компаниялары, банктер, брокерлік ұйымдар және басқа да ірі тапсырыс берушілер болған.
Тергеу нұсқасы бойынша, 2022 жылы компания серіктестері арасында корпоративтік жанжал туындаған. Осыдан кейін «Webcom Kazakhstan» компаниясын іс жүзінде басқарған Евгений Горожанкин компания ақшасын өзімен байланысты заңды тұлғалардың шоттарына аударуды, сондай-ақ тиімді клиенттердің бір бөлігін сонда өткізуді тапсырған.
Нәтижесінде, тергеу анықтағандай, «Webcom Kazakhstan» банкроттық алдында қалған. Компанияның шетелдік қосымша иелері құқық қорғау органдарына жүгінген.
Тергеу қорытындысы бойынша, компаниядан қаражат шығарылып, басқа да заңсыз әрекеттер жасалған деген шешімге келді. Іс материалдарында, атап айтқанда, басшының жеке жалақысын 2 мыңнан 5 мың долларға дейін өсіргені және өзіне қайтарылмайтын қарыздар бергені атап өтілген.
Өткен жылдың көктемінде Евгений Горожанкин ұсталды. Кейінірек оның қол астындағы қызметкері Евгения Корнюшко да қамауға алынды. Екеуіне де жымқыру бабы бойынша айып тағылды.
Сотта Горожанкин кінәсін тек 39 млн теңге сомасындағы өз бетінше билік ету (самоуправство) әрекеті бойынша ғана мойындады. Оның айтуынша, қалған қаражат жымқырылмаған, тек клиенттердің қажеттіліктеріне жұмсалған көрінеді. Евгения Корнюшко да осындай ұстанымда болды.
Алайда сот «Webcom Kazakhstan» ақшасын басқа компаниялардың шоттарына аудару аса ірі мөлшердегі жымқыру болып табылады деген қорытындыға келді.
Процесс нәтижесінде Евгений Горожанкин 8 жылға бас бостандығынан айырылды. Евгения Корнюшко жазасын өтеу мерзімін кейінге қалдырумен 7 жылға бас бостандығынан айыру жазасын алды.
Іс бойынша жымқырылған қаражаттың жалпы сомасы 473 млн теңгені құрады.