В Атырау +26.7 
Әлеуметтік желілерде Жогорку Кенештің бұрынғы депутаты және Қырғызстанның Еңбек және әлеуметтік даму экс-министрі Ұлықбек Кочкоровтың видеосы қызу талқылануда.
Кадрларда Кочкоровқа ұқсайтын ер адам автокөліктің жүк салғышына пакеттерді тиеп жатыр, деп хабарлайды 24.kg.
Видеоның сипаттамасында бұрынғы шенеуніктің қазір АҚШ-та, шамамен Amazon компаниясында курьер болып жұмыс істейтіні айтылған.
Бұл ролик желі қолданушылары арасында үлкен резонанс тудырды. Бірі Кочкоровты қолдап, оның адал еңбекпен айналысып жүргенін атап өтсе, енді бірі оның саяси карьерасы мен Қырғызстандағы мемлекеттік қызметтегі жұмысын еске түсірді.
Ұлықбек Кочкоров «Ата-Журт» партиясынан V шақырылымдағы Жогорку Кенештің депутаты болған. 2017 жылы ол президенттік сайлауға қатысып, 2018 жылдың қазан айында Қырғызстанның Еңбек және әлеуметтік даму министрі болып тағайындалды.
Сондай-ақ, ол 2020 жылы «Биримдик» партиясынан Жогорку Кенеш сайлауына қатысқан болатын.
Билік басына Садыр Жапаров келген 2020 жылғы қазан айындағы оқиғалардан кейін Кочкоров лауазымынан босатылды. Кейін ол өзінің жұмыстан шығарылғанын интернеттен білгенін мәлімдеген еді.
Жарияланымдардың мәліметінше, соңғы жылдары Ұлықбек Кочкоров отбасымен бірге Чикаго қаласында тұрып жатыр. Сонымен қатар, ол қоғамдық өмірге белсенді араласпайды және өзінің көшіп кетуі мен қазіргі қызметі туралы пікір білдіруден бас тартады.