В Атырау +26 
Украина Президенті Владимир Зеленский ресейлік миллиардер Роман Абрамовичтің Киевке жасырын түрде келгенін растады. Украина көшбасшысы ол арқылы Владимир Путинге Донбасқа қатысты негізгі жолдауды беріп жіберген, деп хабарлайды Deutsche Welle.
Британдық Sky News телеарнасына берген сұхбатында Зеленский толық құпиялылық сақтауды өтінген Абрамович сапарының басты мақсаты — Киевтің бейбітшілік орнату үшін қандай жолдармен жол беруге (компромиске) дайын екенін анықтау болғанын айтты.
«Мен оған былай деп жауап бердім: мәселе бізде емес, сіздер біздің жерімізде бізге қарсы соғысып жатырсыздар. Және мен оған Донбасс туралы айттым, бұл басты жолдау болатын. Мен: «Біз кетпейміз, өз жерімізді тастамаймыз. Сіздерге бұлай жеңуге жол бермейміз», — дедім», — деп мәлімдеді Владимир Зеленский.
Украина көшбасшысы кез келген ымыраға келу тек от тоқтатылғаннан кейін ғана мүмкін болатынын айтты. Оның сөзінше, Украина тарапынан отты тоқтатудың өзі қазірдің өзінде «ең үлкен ымыра» болмақ.
Бетпе-бет кездесуге дайындық және Трамптың рөлі
Зеленский Ресей Президентімен «кез келген күні және кез келген форматта», бірақ тек бейтарап аумақта (Ресей мен Беларусьті қоспағанда) жеке келіссөздер жүргізуге дайын екенін тағы де растады. Сонымен қатар, ол келіссөздерге АҚШ Президенті Дональд Трамп пен еуропалық көшбасшылардың қатысуына қарсы еместігін, бірақ екіжақты форматты да жоққа шығармайтынын атап өтті.
Бұған дейін Financial Times басылымы өз дереккөздеріне сілтеме жасап, бұл сапардың мамыр айында өткенін хабарлаған еді. Журналистердің мәліметінше, АҚШ Таяу Шығыстағы қақтығысқа назар аударған тұста, Украина тікелей келіссөздерге қатысты ниетінің маңыздылығын көрсеткісі келген.
Владимир Путиннің нұсқасы
Айта кету керек, бұған дейін бірнеше күн бұрын, 5 маусымда, Петербург халықаралық экономикалық форумында Владимир Путин де Абрамовичтің тегін атамай, осы оқиғаны тілге тиек еткен болатын. Оның айтуынша, «ресейлік бизнес-қоғамдастықтың бір өкілі» оған өзін Киевке шақырып жатқанын хабарлаған, содан кейін бұл бизнесмен шынымен де Зеленскиймен кездесуге барған.
Алайда, РФ Президентінің нұсқасы бойынша, Зеленский делдал арқылы одан жеке кездесуді өтінген көрінеді, бірақ Ресей жетекшісі Киевтің мақсаты тек ресейлік әскердің ілгерілеуін тоқтату деп есептеп, бұл кездесуден бас тартқан.
Еске сала кетейік, ресейлік бизнесмен Роман Абрамович ауқымды қақтығыс басталған алғашқы апталардан бері Мәскеу мен Киев арасындағы бейресми делдал рөлін атқарып келеді. Бұған дейін ол 2022 жылдың көктеміндегі Стамбул келіссөздеріне қатысып, сондай-ақ «астық мәмілесінің» жүзеге асуына және әскери тұтқындарды алмасу процестеріне ықпал еткен болатын.