В Атырау +28.3 
Арменияда сыбайлас жемқорлық пен ақшаны заңсыз айналдыру ісі бойынша бұрынғы жоғары лауазымды тұлғаларға қамауға алу туралы ордер шығарылды. Бұл туралы АА хабарлады.
Мемлекеттік ақпарат агенттігі Арменпресс хабарлағандай, айып тағылғандар қатарында бұрынғы білім және ғылым министрі Армен Ашотян, бұрынғы қаржы министрі Гагик Хачатрян, бұрынғы қорғаныс министрі Виген Саркисян және тағы басқа шенеуніктер бар.
Тергеу деректеріне сәйкес, 2009–2016 жылдар аралығында қызмет бабын теріс пайдалану фактілері орын алған. Брюсов атындағы мемлекеттік университетке тиесілі 451,1 шаршы метр жылжымайтын мүлік мемлекеттік меншік құрамынан шығарылып, жалған мәміле арқылы сатылған. Кейін ол қаржы министрі болған Гагик Хачатрянның ұлы Артем Хачатрянның атына тіркелген.
Сонымен қатар, қамауға алу ордері университеттің бұрынғы ректоры Гаяне Гаспарян мен бұрынғы проректоры Артур Авагянға да берілген.
Еске сала кетсек, аталған кезеңде Виген Саркисян университеттің басқару кеңесінің төрағасы болған, Армен Ашотян білім және ғылым министрі қызметін атқарған, ал Гагик Хачатрян қаржы министрі әрі Мемлекеттік кірістер комитетінің төрағасы болған.