В Атырау +21.6 
Кувейт Иран тарапынан жасалған түнгі шабуылдарға байланысты елдегі екі ирандық дипломатты «қалаусыз тұлға» деп жариялап, Иран елшілігінің қызметкерлер санын қысқартуға шешім қабылдады, деп хабарлайды АА.
Кувейт Сыртқы істер министрлігінің жазбаша мәлімдемесінде Иранның Кувейттегі уақытша сенімді өкілі Хамид Якуби Фер министрлікке шақырылғаны айтылды. Оған Иранның шабуылдарына байланысты наразылық нотасы тапсырылып, елшіліктегі қызметкерлер саны қысқартылатыны хабарланды.
Кувейт Иран елшілігінде жұмыс істейтін екі дипломатты елден шығарып жіберуді талап етті. Оларға 24 сағат ішінде елді тастап кету міндеттелді.
Бұл шешім Иранның Кувейтке жасаған шабуылдарынан кейін қабылданды. Шабуыл кезінде көптеген азаматтық және маңызды нысандар, соның ішінде Кувейт халықаралық әуежайы да зардап шеккен. Нәтижесінде бір адам қаза тапты. Кувейт бұл әрекеттерді өзінің егемендігі мен аумақтық тұтастығын, сондай-ақ БҰҰ Жарғысын және Қауіпсіздік Кеңесінің №2817 қарарын бұзу деп бағалады.
Мәлімдемеде Кувейт Иранның шабуылдарын қатаң айыптап, өз аумағы мен әуе кеңістігін басқа елге қарсы дұшпандық әрекеттер жасау үшін пайдалануға жол бермейтінін атап өтті. Иранның мәлімдемелері «негізсіз» деп танылып, олар Кувейтке, оның халқы мен инфрақұрылымына шабуыл жасауға себеп бола алмайтыны айтылды.
Кувейт халықаралық құқыққа сәйкес өзін қорғауға, қауіпсіздігін қамтамасыз етуге және егемендігі мен халқын қорғау үшін барлық қажетті шараларды қабылдауға құқылы екенін мәлімдеді.
Иранның Ислам революциясы сақшыларының армиясы АҚШ-тың Кешм аралына жасаған шабуылына жауап ретінде Кувейттегі америкалық әскери базаларға зымыран соққысын жасағанын хабарлады.
Кувейт армиясы ирандық «камикадзе» дрондарының шабуылы салдарынан халықаралық әуежайдың жолаушылар терминалына зақым келгенін және көптеген адамның жараланғанын мәлімдеді.
Кувейт Азаматтық авиация басқармасы Иран шабуылынан кейін халықаралық әуежайдағы ұшулар уақытша тоқтатылғанын хабарлады.