​Өндіріс құлдырады ма, әлде «елеусіз іркіліс» пе? Теңіз кен орнында не болды

Қазақстанның ең ірі мұнай-газ кен орындарының бірінде операциялық іркіліс орын алды. «Теңізшевройл» (ТШО) нысандарындағы ақаулар туралы ақпаратты жобаның негізгі акционері — американдық Chevron корпорациясы растады, деп хабарлайды Рейтер.

Американдық компанияның ресми мәліметінде бейсенбі күні болған оқиға «елеусіз» деп аталды. Chevron қазіргі уақытта жағдайдың тұрақталғанына сендірді.

«Компанияның басымдығы — қауіпсіз және сенімді жұмысты қамтамасыз ету. Қазір мұнай өндірісі біртіндеп қалпына келуде. ТШО өз қызметі мен коммерциялық мәселелеріне қатысты қосымша мәліметтерді жария етпейді», — деп мәлімдеді корпорациядан.

Дереккөздер не дейді?

Ірі компанияның салмақты ұстанымына қарамастан, Рейтер дереккөздері оқиға ауқымының әлдеқайда күрделі екенін хабарлады. Олардың мәліметінше, алып Теңіз кен орнында мұнай өндіру іс жүзінде 26 мамырда-ақ құлдырап кеткен, содан кейін өндірістік қуатты біртіндеп қалпына келтіру жұмыстары басталған. Өндірістің төмендеп кетуінің нақты себептері аталмады.