В Атырау +23.7 
Биыл түлектердің қауіпсіздігін қамтамасыз ету үшін мектеп бітіру кештерін мейрамхана, кафе, банкет залдары, демалыс орындары мен табиғат аясында өткізуге тыйым салынды.
Сондай‑ақ автокортеж ұйымдастыруға және «таң қарсы алу» дәстүрін өткізуге рұқсат берілмейді. Бұл туралы облыстық білім беру басқармасының басшысы Марат Әбуов хабарлады.
Оның айтуынша, ата‑аналар мен оқушылардан заңсыз ақша жинауға жол берілмейді. Мұндай әрекеттер заң бұзушылыққа әкелуі мүмкін. Талаптар ҚР Оқу‑ағарту министрлігінің 2026 жылғы 29 сәуірдегі №106‑НҚ бұйрығына сәйкес күшейтілген.
— Қатаңдатылған ережелер балалардың қауіпсіздігін сақтауға бағытталған. Өйткені мектеп бітіру кештерінде болған қайғылы жағдайлар баршаға белгілі. Сондықтан мектеп директорларын, ата‑аналарды және оқушыларды заңды қатаң сақтауға шақырамын, — деді Марат Әбуов.
Атырау облысында биыл 11‑сыныпты 8 042 оқушы аяқтайды. Оның ішінде 253 түлек «Алтын белгіге», 445 оқушы «Үздік аттестатқа» үміткер. Ал 9‑сыныпты 13 906 оқушы бітіреді, олардың 838‑і «Үздік аттестат» алуға ниетті.
Қазіргі таңда өңірде 232 мектеп жұмыс істейді, онда 154 мыңнан астам оқушы білім алуда.