В Атырау -10 
Мемлекет жоғары оқу орындарынан шығарылып кеткен студенттерді оқытуға 19 миллиард теңгеден астам қаражат жұмсаған. Бұл туралы Мәжілістегі Үкімет сағатында Жоғары аудиторлық палатаның (ЖАП) мүшесі Тілеген Каскин мәлімдеді.
Аудиторлардың мәліметінше, 2022-2024 жылдар аралығында еліміздің университеттерінен мемлекеттік грантта оқыған 24 мыңға жуық студент оқудан шығарылған. Оларды оқытуға бюджеттен 19,6 миллиард теңге жұмсалып үлгерген.
Т. Каскин атап өткендей, қаражаттың есебінде ашықтықтың жоқтығы жағдайды қиындатып отыр. Оқудан шығарылған 10 мың студент бойынша жүйеде пайдаланылған грант сомалары туралы мүлдем мәлімет жоқ.
«Бұл ретте, елімізде оқудан шығарылған студенттер бойынша қаражатты қайтарудың толыққанды механизмі қазіргі уақытта жоқ», — деп атап өтті Жоғары аудиторлық палата өкілі.
Заңдағы шикіліктер мен «мәңгілік» магистранттар
Баяндама барысында түлектердің мамандық бойынша міндетті жұмыс өтеуден жалтару үшін қолданатын әдістері де айтылды:
Жалған магистратура: Студенттер жұмыс өтеуден қашу үшін ғана келесі оқу сатысына түседі, содан кейін оқудан шығып кетеді. Бұл санат бойынша болжамды шығын 10,8 миллиард теңгеге бағаланып отыр.
«Жұмыс іздеуші» мәртебесі: 1,5 мыңға жуық түлек ресми түрде жұмыс іздеуші ретінде тіркелген. Заң бойынша бұл міндеттемені орындау болып есептеледі, бірақ іс жүзінде экономика қажетті мамандарды алмай отыр.