Алматыда ұлттық белгі бойынша қорлағаны үшін қылмыстық іс қозғалды

Алматы қаласының тұрғыны Виолетта П.-ға қатысты әлеуметтік желідегі жазбалары үшін қылмыстық іс қозғалды. Бұл туралы Halyqstan хабарлайды. 

Әйел адам ұлттық белгі бойынша қорлау, Қазақстанның мемлекеттік тәуелсіздігіне қатысты кемсіту пікірлері және діни сезімдерді қорлау белгілері бойынша тергеуге алынды.

Полицияның мәліметінше, әлеуметтік желілерде тараған жазбалар қоғамда кең резонанс тудырып, азаматтардан көптеген шағым түскен. Осыдан кейін күдіктінің жеке басы анықталып, ол полицияға жеткізілді.

Құзырлы орган өкілдері мұндай әрекеттердің заң бойынша қатаң бағаланатынын атап өтті.

«Азаматша П. полицияға жеткізілді. Қазіргі уақытта оның әрекеттеріне құқықтық баға берілуде. Ұлттық белгі бойынша қорлау фактілері — мүлдем жол берілмейтін әрекет, және мұндай құқықбұзушылық жасаған барлық тұлғалар жауапкершілікке тартылады», — деп хабарлады Алматы қалалық ПД.

Сонымен қатар ведомство қоғамдық келісімді бұзуға бағытталған кез келген әрекет пен арандатушылық контенттің қатаң түрде тоқтатылатынын мәлімдеді.

Белгілі болғандай, әйел адам Қазақстан азаматы және бұған дейін жарнама компаниясында директор қызметін атқарған. Даудан кейін ол жұмыстан босатылған.