В Атырау -10 
24 сәуірде Астанада блогерлер Ерболат Жанабылов пен Эльмира Төлегенованың ісі бойынша сот отырысы жалғасты. Отырыс сотталушылардың соңғы сөзіне көшуі тиіс еді, бірақ Төлегенованың мәлімдемесінен кейін процестің бағыты өзгерді.
Сот залына Ерболат Жанәбілов пен оның адвокаты келді. Эльмира Төлегенова залда болмады, ол кейінірек процеске онлайн режимде қосылды.
Өзінің соңғы сөзінде Төлегенова болған жағдай үшін жауапкершілікті сезінетінін, істеген ісіне өкінетінін айтып, соттан өзіне және жұбайына бас бостандығынан айырумен байланысты емес жаза тағайындауды сұрады.
«Біз өзіміз үшін үлкен қорытынды жасадық, бұл біз үшін өмірлік сабақ болды. Заңды бұзғанымызға шын жүректен өкінеміз. Бізге түсіністікпен қарап, мені мен жұбайыма бас бостандығынан айырумен байланысты емес жаза тағайындауыңызды сұраймын», — деді сотталушы.
Осыдан кейін Төлегенова сот кеңесу бөлмесіне кеткенге дейін процестік келісім жасасу туралы өтініш білдірді. Судья бастапқыда мұндай өтініш сот тергеуі басталғанға дейін берілуі керек екенін атап өтті. Алайда, қорғау тарапы Қылмыстық іс жүргізу кодексінің 615-бабына сүйеніп, сотталушының мұндай өтінішті сот кеңесу бөлмесіне кеткенге дейінгі кез келген сатыда бере алатынын алға тартты.
Нәтижесінде сот тергеуді қайта бастау туралы қаулы шығарып, прокурорға Төлегенованың өтінішін қарауға уақыт берді.
Мемлекеттік айыптаушы бұл бастама тек Төлегеноваға ғана қатысты ма, әлде Жанабылов та процестік келісім жасасуға ниетті ме екенін нақтылады. Сондай-ақ, ол заң бойынша сотталушылар кінәсін толық мойындауы тиіс екенін еске салды.
Адвокат Төлегеноваға барлық шарттар мен салдарлар түсіндірілгенін айтты. Сонымен қатар, процестік келісімнің шарттары құпия болып табылады. Осыдан кейін залдағылардан шығу сұралып, адвокат пен прокурор мәселені талқылау үшін қалды.
Естеріңізге сала кетейік, 23 сәуірдегі отырыс Төлегенованың келмеуіне байланысты кейінге қалдырылған болатын. Сот қорғау тарапына медициналық құжаттарды ұсынуға уақыт беріп, процесті келесі күнге ауыстырған еді.