В Атырау -10 
Редакция соңғы апталарда өңір үшін маңызды тақырыптарға қатысты бірнеше материал жариялағаннан кейін екі мемлекеттік орган — облыстық білім басқармасы мен Атырау қаласының әкімдігі «Ақ Жайықтың» ресми сауалдарына жауап беруден бас тартып, журналистік мәртебенің расталмағанын алға тартты.
Білім басқармасы: баспасөзсіз баспасөз турынан бастап BINOM бойынша сұрақтарға дейін
Бәлкім, бұл жағдайға «Ақ Жайықтың» жариялаған бірқатар материалдары себеп болған шығар. Соның ішінде министрдің Атырауға сапарына қатысты: сол кезде журналистерді бастапқыда баспасөз турына қосқанымен, кейін автобустан түсуді өтініп, ақпаратты өңірлік коммуникациялар қызметі таратады деп түсіндірген еді. Ал журналистерде мектеп оқушыларына қатысты резонансты оқиғалар мен мұғалімдердің президентке жолдаған үндеуі жөнінде қояр сұрақтары көп еді.
...Сапар нәтижесі «әкімдіктің мобилографы» түсірген кадрлар арқылы мінсіз өтті, ал журналистердің өткір сұрақтары жауапсыз қалды.
Кейінірек редакция BINOM мектептерінің жұмысына қатысты ресми сауал жолдады. Онда қаржыландыру, басқару, кадр саясаты, білім сапасы және оқушылардың кетуі туралы сұрақтар қойылған еді.
Алайда нақты жауап берілмеді. Білім басқармасы журналистік мәртебенің расталмағанын алға тартты. Бұл ретте редакция сауалды ресми бланкімен, тіркеу нөмірімен және редактор қол қойып, жолдаған еді. Заң бойынша журналист мәртебесін қосымша растау талабы қарастырылмаған.
Әкімдік: жаназа, жер және бюджет
Қала әкімдігімен қарым-қатынас та «Ақ Жайықтың» соңғы жарияланымдарынан кейін қиындай түсті.
Нақты қай мақаланың қай мемлекеттік органды «ренжіткенін» айту қиын, бұған соңғы апталардағы кез келген жарияланым себеп болуы мүмкін. Мысалы, «Иманғали» мешітінде ауыр қылмыс үшін сотталған адамға жаназа намазының оқылуы туралы резонансты материал немесе зорлықшының қала әкімі Шәкір Кейкінмен туыстық байланысы жайлы резонансты хикая.
Әлде, әкімдікте редакцияның бірнеше журналисінің аты-жөнін «ұмытуына» Ломоносов атындағы мектептің орнына жаңа мектеп салу үшін жер телімін алу туралы жарияланым себеп болды ма екен?! Сол мақалада жобаның сот процестерімен қатар жүргені, әкімдік тарапынан рәсімдік қателіктер кеткені және осының бәрі құрылыс мерзімін созып жібергені егжей-тегжейлі баяндалған еді.
Бұдан басқа, Нұрсая ықшамауданындағы әкімдік ғимаратының жалға алу шығыны 16 миллиондай теңге екені де бөлек тақырыпқа айналған болатын.
Жалпы алғанда, редакцияның ресми сауалдарына мазмұнды жауап беруді тоқтататындай, нақты қай мақаланың соншалықты мемлекеттік органның «шамына тигенін» дөп басып айту қиын.
«Ақ Жайық» газеті өңірдегі мемлекеттік органдармен көп жылдан бері жұмыс істеп келеді: ресми сауалдар жолдап, алынған жауаптарды жариялап отырды. Бұған дейін журналист мәртебесін қосымша растау талабы қойылмаған еді, енді редакцияның соңғы сауалдарына ғана осындай талаптар қойыла бастады.
Естеріңізге сала кетейік, БАҚ-тың басты міндеті — сұрақ қою және жауап алу, оның ішінде лауазымды тұлғаларға ыңғайлы бола бермейтін тақырыптар бойынша да. Бұл журналистика жұмысының бір бөлігі.
Біз мұндай формалды себеппен жауап беруден бас тарту тәжірибесін ақпаратқа қол жеткізуді шектеу және бұқаралық ақпарат құралдарының заңды қызметіне кедергі ретінде бағалауға болады деп санаймыз.
Осыған байланысты „Ақ Жайық“ журналистердің құқықтарын қорғау және сөз бостандығы мәселелерімен айналысатын салалық ұйымға түсініктеме алу үшін жүгінген еді.
Редакция көтерілген мәселелер бойынша мемлекеттік органдардың ресми ұстанымын жариялауға дайын.
«Ақ Жайық» газетінің редакторы Анастасия ШЕРСТЯНКИНА