В Атырау -10 
Қазақстанда қоғамдық орындарда кальян шегуге толық тыйым салу нормасы қайта қаралуы ықтимал. Денсаулық сақтау министрі Ақмарал Әлназарова қатаң шектеулердің тиімді болмағанын түсіндірді.
Министрдің айтуынша, тыйымға қарамастан, елдегі мекемелерде кальян шегу жалғасуда. Бұл ретте «түтінсіз орта» қағидалары сақталмай, балалар мен басқа да келушілердің көзінше кальян қолдану орын алып отыр.
«Қазақстан бір кездері кальянға толық тыйым салу жолын таңдады. Алайда тәжірибе көрсеткендей, оларды әлі де шегеді. Егер норма жұмыс істемесе, оны талдап, түзету қажет», – деді Әлназарова.
Қазір үкімет заңды «жұмсарту» немесе қатаң реттеу арқылы легализациялау мүмкіндігін талқылап жатыр. Министр бизнес тарапынан ресми сұраныс болмағанын, бастаманың сарапшылардан шыққанын атап өтті.
Талқыланып жатқан нұсқалар:
- арнайы акциз енгізу;
- темекі мен алкогольден түскен қаржыны салауатты өмір салтын насихаттауға бағыттау;
- кальянға арналған арнайы аймақтар белгілеу.
Әзірге нақты шешім қабылданған жоқ.
Еске салсақ, 2024 жылы президент Қасым-Жомарт Тоқаев вейптер мен ароматизаторларға толық тыйым салған заңға қол қойған еді. Ал кальянға қатысты шектеулер бұрыннан бар болғанымен, көптеген мекемелер айыппұлды «бизнес шығыны» ретінде төлеп, қызметті жалғастыра берген.