В Атырау -10 
Жоғарғы сот өз жұбайын қорғау кезінде ер адамды ажал құштырған Абай облысы тұрғынының ісін қайта қарады. Бұған дейін ұзақ мерзімге сотталған әйел сот отырысынан кейін бірден бостандыққа шықты, деп хабарлайды Centralmedia24.
Қайғылы оқиға 2024 жылдың шілдесінде болған. Іс материалдарына сәйкес, сотталушының күйеуіне бір ер адам шабуыл жасап, оны жерге құлатып, мойнын аяғымен басып тұншықтыра бастаған. Жұбайын құтқармақ болған әйел шабуылдаушының басынан ағаш кесіндісімен ұрған. Алған жарақаты салдарынан ер адам көз жұмған.
Бостандыққа апарар жол
Бастапқыда аудандық сот әйелді «Қасақана адам өлтіру» бабы бойынша кінәлі деп танып, оны 6 жылға бас бостандығынан айырған, сондай-ақ марқұмның отбасына 3 миллион теңге төлеуге міндеттеген. Облыстық сот бұл үкімді өзгеріссіз қалдырды.
Алайда кассациялық саты істің егжей-тегжейін зерттей келе, басқаша қорытындыға келді. Сот әйелдің шынымен де күйеуінің өмірін қорғау мақсатында әрекет еткенін, бірақ ауыр затпен тым қатты соққы жұмсап, қажетті қорғаныс шегінен шығып кеткенін анықтады.
Жазаны жеңілдететін мән-жайлар
Жаңа шешім шығару кезінде сот мыналарды ескерді:
Әйелдің өкініш білдіруі;
Кәмелетке толмаған баласының болуы;
Үшінші топтағы мүгедектігі;
Жанжалды марқұмның өзі бастағаны.
«Кассациялық саты әйелдің әрекетін қайта саралап, оған бір жылға бас бостандығынан айыру жазасын тағайындады. Іс қаралған сәтте ол бұл мерзімді тергеу изоляторы мен колонияда іс жүзінде өтеп қойғандықтан, әйел дереу қамаудан босатылды», — деп хабарлады соттан.