Тоқаев бокстан Азия чемпионы атанған қыздарды құттықтады

Қасым-Жомарт Тоқаев бокстан өткен Азия чемпионатында жеңіске жеткен қазақтың спортшы қыздарын құттықтады. 

Президент Дина Исламбекова мен Надежда Рябецті асқан шеберлігі, жеңіске деген ерік-жігері мен отаншылдық сезімі жанкүйерлерді тәнті еткенін атап өтіп, құттықтау жолдады. 

Мемлекет басшысы ұлттық құрама мүшелеріне алдағы әлем чемпионаттары мен Лос-Анджелес Олимпиадасында биіктен көрінуіне тілектестік білдірді.

Улан-Баторда 9 сәуірде аяқталған бокстан Азия чемпионатының қорытындысы бойынша Қазақстан әйелдер құрамасы жалпы медальдық есепте екінші орынды иеленді.

Отандық спортшылар турнир барысында барлығы бес медаль жеңіп алды:

• Алтын: Дина Исламбекова мен Надежда Рябец Азия чемпионы атанды;

• Күміс: Бақыт Сейдіш жүлдегерлер қатарынан көрінді;

• Қола: Әйгерім Сәттібаева мен Валентина Хальзова құрама қоржынына қола жүлде салды.

Жалпы есепте Үндістан құрамасы (4 алтын, 2 күміс, 4 қола) көш бастады. Үздік үштікті Қытай елінің өкілдері түйіндеді.

Айта кетейік, айтулы додаға Азияның тоғыз елінен келген ең мықты былғары қолғап шеберлері қатысып, бақ сынады.