В Атырау -10 
Алматыда бұрын мемлекет меншігіне өткен Kaisar Plaza бизнес-орталығын сату бойынша сауда-саттық өтпей қалды. Электрондық сауда алаңының мәліметінше, аукцион басталғанға дейін бірде-бір қатысушы тіркелмеген, деп хабарлайды Informburo.kz.
Нысанды саудаға қайтарылған активтерді басқару жөніндегі компания шығарған болатын. Бұл бизнес-орталықты кезінде Қайрат Сатыбалды мемлекетке өткізген еді.
Сауда-саттық шарты бойынша бастапқы баға 61 547 298 223 теңге болса, кепілдік жарна мөлшері 9 232 094 734 теңге болды. Аукцион 7 сәуірде сағат 10:00-де бағаны көтеру әдісімен өтетін болып белгіленді.
Бизнес-орталық Алматы қаласындағы Желтоқсан мен Бөгенбай батыр көшелерінің қиылысында орналасқан. Ғимараттың жалпы ауданы 63,9 мың шаршы метрді құрайды. 9 қабатты нысанда қазіргі уақытта 53 кәсіпкер кеңсе жалдап отыр.
Әлеуетті сатып алушыларға нысанның ауданына қатысты құжаттардағы айырмашылықтар туралы алдын ала ескертілген. Тіркелген құқықтар туралы анықтамада ауданы 63 920 шаршы метр деп көрсетілсе, техникалық паспорттың телнұсқасында — 56 480 шаршы метр деп жазылған.
Бұл айырмашылық 2 297 шаршы метрлік панорамалық қабат іс жүзінде шатыр болып саналады және жалпы ауданға кірмейді, Қайта есептеуден кейін аудан тағы 5 143 шаршы метрге азайған деп түсіндірілді.
Лот картасына сәйкес, нысанның 2025 жылғы 22 желтоқсандағы жағдай бойынша бағаланған құны 47 344 075 556 теңгені құраған.