В Атырау -10 
Көлік иелері үшін техникалық байқау мен сақтандыру полисінің мерзімін қадағалау тек айыппұлдан құтылу емес, жолдағы жауапкершіліктің белгісі. Қазіргі таңда автоматты камералар құжат мерзімін қас қағымда анықтайды.
Ішкі істер министрлігі еліміздің барлық жол қозғалысына қатысушыларға үндеу жасап, құжаттардың жарамдылық мерзімін тексерудің маңызын тағы бір мәрте еске салды. Бұл туралы Polisia.kz ақпараттық порталы хабарлады.
Үйде отырып тексеруге мүмкіндік бар
Министрлік өкілдерінің айтуынша, қазіргі цифрлық заманда жүргізуші куәлігін, сақтандыруды және техникалық байқауды тексеру немесе жаңарту бірнеше минутты ғана алады. Бұл процестерді онлайн форматта, кезексіз жүзеге асыруға жағдай жасалған.
«Бұл жай ғана бюрократиялық ереже емес. Бұл — сіздің және айналаңыздағы адамдардың қауіпсіздігі. Техникалық байқау — көліктің ақаусыздығын растаса, сақтандыру полисі — жол-көлік оқиғасы бола қалған жағдайда сіздің мүддеңіз бен қаржыңызды қорғайды», — деді ІІМ баспасөз хатшысы Шұғыла Тұрлыбек.
Жазалау емес, алдын алу
Бүгінде жолдардағы автоматты тіркеу камералары мерзімі өткен құжаттарды бірден анықтауға қауқарлы. Алайда, құқық қорғау органдары бұл шаралардың басты мақсаты жазалау емес, тәуекелдердің алдын алу екенін баса айтты.
Жүргізушілерге мына құжаттарды дәл қазір тексеру ұсынылады:
Жүргізуші куәлігі: Жарамдылық мерзімі өтіп кетпеген бе?
Сақтандыру полисі: Сақтандыру күшінде ме?
Техникалық байқау: Көлік тексерістен уақтылы өткен бе?
Мамандардың пікірінше, заң мен тәртіп әрбір азаматтың жеке жауапкершілігінен басталады. Қарапайым талаптарды сақтау — жолдағы сенімділік пен қауіпсіздіктің басты кепілі.