В Атырау -10 
Астанада полиция қызметкерлері тәжірибелі жүргізушілер де, жасөспірімдер де қатысқан қауіпті көше жарыстарының жолын кесті, деп хабарлайды Polisia.kz.
Оқиға Салық Зиманов көшесінде орын алған. Құқық қорғау органдарының мәліметінше, бір топ жүргізуші қауіпсіздік ережелерін елемей, апаттық жағдайлар туғызып, тура қала жолдарында жарыс ұйымдастырған.
Көлік тізгінінде кімдер болды?
Құқық бұзушылар тізімінде үш адам бар:
Skoda автокөлігінің 18 жастағы жүргізушісі;
Toyota Highlander мінген 33 жастағы ер адам;
Жол талғамайтын Toyota Highlander көлігін тізгіндеген кәмелетке толмаған жасөспірім.
«Жүргізушілер жол қозғалысы ережелерін өрескел бұзып, апаттық жағдай туғызған. Барлық қатысушыларға қатысты әкімшілік хаттама толтырылды», — деп хабарлады полициядан.
Ата-аналарға қолданылған жаза
Жасөспірімнің заңды өкіліне ерекше назар аударылды. Оған қатысты бірден бірнеше хаттама рәсімделді:
- Көлікті басқару құқығы жоқ адамға рөлді бергені үшін;
- Баланы тәрбиелеу бойынша міндеттерін тиісінше орындамағаны үшін;
- Кәмелетке толмаған баланың түнгі уақытта заңды өкілінсіз үйден тыс жерде жүргені үшін.
Жарысқа қатысқан барлық автокөліктер тәркіленіп, коммуналдық тұраққа қойылды.
Құқық бұзушылық статистикасы
Полиция департаменті «жүйріктермен» күрес күшейтілген режимде жүріп жатқанын атап өтті. 2026 жылдың басынан бері елордада:
1 800-ге жуық жүргізуші апаттық жағдай туғызғаны үшін жазаланды;
3 000-ға жуық адам маневр жасау ережелерін бұзғаны үшін жауапкершілікке тартылды.
Тәртіп сақшылары көше жарыстары ерекше бақылауда екенін және қала көшелерінде заңсыз жарыс ұйымдастыру әрекеттерінің жолы қатаң кесілетінін қадап айтты.