В Атырау -10 
Павлодар қаласының 11-сынып оқушысы Игорь Мартынюк YC Startup School білім беру бағдарламасына толық грант алған Орталық Азиядағы алғашқы оқушы атанды. Бағдарламаны әлемдегі ең беделді стартап акселераторлардың бірі — Y Combinator ұйымдастырады.
Игорь өз бетінше әзірлеген TabAI стартапы жасанды интеллект негізінде жұмыс істейтін көмекші болып табылады. Ол пайдаланушының цифрлық белсенділігін талдап, тапсырмаларды жүйелеуге және жұмыс үдерістерін басқаруға көмектеседі. Қазіргі таңда платформаны әлем бойынша шамамен 20 мың қолданушы пайдаланып отыр.
Жоба халықаралық қауымдастықтың назарын аударып, 35 мың доллар инвестиция мен инфрақұрылымды дамытуға арналған Google грантын иеленді. Жас шектеулеріне қарамастан, Y Combinator Игорьді Кремний алқабындағы YC Startup School бағдарламасына шақырып, оқу, жол ақысы және тұру шығындарын толық өтеді.
Сонымен қатар, Игорь Мартынюк жасанды интеллект саласында қарқынды дамып келе жатқан Cursor компаниясының ресми амбассадоры атанды. Ол Қазақстан мен Орталық Азияда әзірлеушілер қауымдастығын дамытып, хакатондар мен білім беру іс-шараларын ұйымдастыруды қолға алмақ.