В Атырау -10 
2026 жылғы 3 ақпанда Ливияда елдің бұрынғы басшысы Муаммар Каддафидің ұлы Саиф әл-Ислам Каддафи өз үйінің бағында оққа ұшты. Бұл туралы Reuters, Türkiye Today және Al Jazeera хабарлады. Оның немере ағасы Хамид Каддафи «Саиф әл-Ислам шәһид болды» деп мәлімдеп, қазасын растады.
53 жастағы Саиф әл-Ислам солтүстік-батыс Ливиядағы Зинтан қаласында қаза тапты. Бір нұсқа бойынша, ол үйіне жасалған шабуыл кезінде атылған. Түрік басылымдары оны Триполиде орналасқан ықпалды 444-бригадамен қақтығыста өлтірілген болуы мүмкін деп болжайды, бірақ бригада бұл айыпты жоққа шығарды.
Ливияда соңғы жылдары қарулы топтардың қатысуымен зорлық-зомбылық жиі орын алып келеді. 444-бригада БҰҰ мойындаған Ұлттық бірлік үкіметінің құрамына кіреді және 2025 жылы Триполиде болған қақтығыста да көзге түскен.
Саиф әл-Ислам шамамен 1972 жылы туған, Муаммар Каддафидің екінші ұлы. Лондон экономика мектебінде білім алған ол әкесінің режимінде реформатор ретінде көрініп, ықтимал мұрагер саналған. 2011 жылы Халықаралық қылмыстық сот оған қарсы адамзатқа қарсы қылмыстар бойынша ордер шығарған. Сол жылы ол көтерілісшілер қолына түсіп, 2017 жылы амнистия аясында босатылған.
Бостандыққа шыққан соң саясатқа қайта оралуға талпынып, 2021 жылы президенттікке кандидат болатынын жариялаған. Алайда Ливиядағы сайлаулар бірнеше рет кейінге қалдырылып, жүзеге аспады.