Енді ипотека үшін артық зейнетақы жинағын қалай пайдалануға болады

Қазақстанда ипотеканы өтеу үшін зейнетақы жинағының артығын пайдалану ережелері өзгерді. Жаңа нормаларды «Отбасы банк» түсіндірді.

Өзгерістер тұрғын үй жағдайын жақсарту мақсатында біржолғы зейнетақы төлемдерін (БЗТ) пайдалану ережелеріне енгізілді. Негізгі жаңалық — «Отбасы банк» арқылы алынған қарызды өтеу кезінде зейнетақы жинағының артығын қандай мақсатқа бағыттауға болатынына қатысты.

Бұрын зейнетақы қаражатын ипотекалық қарыздың барлық бөлігін — пайыздар мен қосымша төлемдерді қоса өтеуге қолдануға болатын. Енді бұл термин «негізгі қарыз» деп өзгертілді. Яғни, БЗТ тек қарыздың негізгі сомасын өтеуге жұмсалады — ішінара немесе толық мерзімінен бұрын төлеу кезінде.

Ал пайыздарды, айыппұлдарды, кешіктірілген төлемдерді және басқа да шығындарды қарыз алушы өз қаражаты есебінен төлеуі тиіс. Бұрынғыдай ай сайынғы төлемді толықтай зейнетақы жинағы есебінен жабу мүмкін болмайды.

Банк түсіндіргендей, өзгерістерге байланысты қашықтан қызмет көрсету жүйелерін қайта бейімдеу қажет. Осыған байланысты БЗТ-ны ішінара немесе толық қарызды өтеуге пайдалану үшін өтінім қабылдау 2026 жылғы 30 қаңтардан 31 қаңтарға қараған түні тоқтатылып, 2 наурыздан қайта басталады. 30 қаңтарға дейін берілген өтінімдер ескі ережелер бойынша қаралады.

Сонымен қатар enpf-otbasy.kz платформасы арқылы зейнетақы жинағының артығын сұрату тәртібі өзгеріссіз қалады. Тұрғын үй жағдайын жақсарту үшін БЗТ қолданудың басқа мақсаттары да бұрынғыдай сақталады.