Жеке стоматологияда да тегін ем бар: бірақ көпшілік білмейді

Қазақстанда белгілі бір санаттағы азаматтар тістерін тегін емдеп, жұлдыра алады. Бұл мүмкіндік тек мемлекеттік емес, жеке стоматологияларда да қарастырылған. Алайда, көпшілік мұндай мүмкіндіктен хабарсыз немесе оған сенімсіздікпен қарайды, деп хабарлайды digitalbusiness.kz.

Талқылауға себеп болған жағдай — Алматыдағы жеке стоматологиялық клиника директорының жарияланымы. Оның айтуынша, медициналық ұйым конкурс жеңіп, балаларға ОСМС аясында тегін стоматологиялық көмек көрсетуді бастаған. Бұл қызмет кезексіз әрі жайлы жағдайда ұсынылады. Бірақ күтілгендей пациенттер ағылып келудің орнына, клиника бос кабинетке тап болған.

Пациенттер алдын ала жазылады, бірақ жиі келмей қалады — кейде соңғы сәтте қабылдауды тоқтатады, кейде мүлде ескертпейді. Ал дәрігерлер демалыс күндері де жұмысқа шығады, кабинеттер дайын, материалдар сатып алынған.

Клиникада түсіндіргендей, тегін қызметтер ОСМС бойынша барлығына емес, тек белгілі бір санаттағы азаматтарға көрсетіледі. Жоспарлы түрде тегін емделу құқығы 18 жасқа дейінгі балалар мен жүкті әйелдерге беріледі — бұл кариес, пульпитті емдеу және ауырсынусыз тісті жұлуды қамтиды.

Шұғыл жағдайларда тізім кеңейеді. Тегін стоматологиялық көмекке зейнеткерлер, мүмкіндігі шектеулі жандар, ардагерлер, көпбалалы аналар, атаулы әлеуметтік көмек алушылар және әлеуметтік маңызы бар аурулары бар пациенттер жүгіне алады.

Бұрын мұндай қызметтер негізінен мемлекеттік емханаларда көрсетілетін. Бірақ жүктеменің көптігіне байланысты мемлекет жеке стоматологияларды да тарта бастады. Олар конкурс арқылы іріктеліп, Әлеуметтік медициналық сақтандыру қорымен келісімшарт негізінде жұмыс істейді.

Соған қарамастан, көптеген қазақстандықтар тегін стоматологияға сенімсіздікпен қарайды. Әлеуметтік желілерде адамдар сапасыз материалдар туралы жазады және ОСМС бойынша ем толыққанды бола ма деген күмән білдіреді. Жеке клиникалар өкілдері болса, пациенттерге әрқашан тегін және ақылы материалдардың айырмашылығын түсіндіріп, таңдау адамның өзіне қалдырылатынын айтады.

Тегін көмек алу үшін учаскелік дәрігерден жолдама қажет емес. ОСМС-пен жұмыс істейтін стоматологияға бару жеткілікті.