В Атырау -10 
Мемлекет басшысы 2026 жылды Цифрландыру және жасанды интеллект жылы деп жариялағаннан кейін Энергетика министрлігі отын-энергетика кешенінде жаңа технологияларды кеңінен енгізуге кірісті.
Министрліктің басты мақсаты – тәжірибелік сынақтарға емес, инфрақұрылымның сенімділігін арттыруға, апаттардың алдын алуға және шығындарды азайтуға бағытталған қолданбалы жобаларды іске асыру.
Қазіргі таңда үш негізгі пилоттық шешім жүзеге асуда:
- Электр желілерін ЖИ-дефектоскопиялау: дрондар мен компьютерлік көру технологиясы арқылы тіректер мен сымдардағы ақауларды, қызып кетулерді, деформацияларды автоматты анықтау. Жоба 2,5 млрд теңге үнемдеуге мүмкіндік береді деп күтілуде.
- Жылу желілерін роботтандырылған құбырішілік диагностика: акустикалық резонанс негізінде жүйені тоқтатпай-ақ құбырлардың жағдайын бағалау. Экономикалық тиімділігі – 42 млрд теңге.
- Газ саласына арналған ЖИ-ассистент: мобильді қосымша арқылы газ есептегіш көрсеткіштерін автоматты тану. Бұл адам факторын азайтып, есепке алудың дәлдігін арттырады.
Пилоттық жобалар тиімділігін дәлелдеді: диагностика уақыты қысқарды, апаттылық төмендеді, ресурстарды үнемдеу артты.
2026 жылы министрлік бұл шешімдерді жаппай енгізуге көшуді жоспарлап отыр. Басым бағыттар қатарында:
- ЖИ-дефектоскопиядағы ақаулар классификаторын кеңейту,
- Магистральдық құбыржолдарда құбырішілік диагностика енгізу,
- Газ саласындағы цифрлық сервистерді дамыту бар.
Сонымен қатар, министрлік отандық ІТ-компаниялармен жасанды интеллектті дамытуға қатысты меморандумдар аясында ынтымақтастықты жалғастырады.