В Атырау -10 
Астана қаласының азаматтық істер жөніндегі ауданаралық сотының судьясы Әсел Досаева қызметінен босатылды.
Бұл туралы Қазақстан Республикасының Жоғары сот кеңесі Ulysmedia.kz жолдаған ресми сауалға берген жауабында мәлімдеді.
Жоғары сот кеңесінің хабарлауынша, шешім 2026 жылғы 22 қаңтарда қабылданған. Кеңес жанындағы Сот жюриі судья Әсел Досаеваны судьялық әдеп нормаларын бұзғаны үшін тәртіптік жауапкершілікке тартып, оған судья лауазымынан босату түріндегі жаза қолдану туралы шешім шығарды.
Еске салайық, 2025 жылдың қараша айында Әсел Досаева Астана қаласында мас күйінде көлік басқарғаны үшін ұсталған. Медициналық сараптама оның ағзасында алкоголь барын растаған. Сонымен қатар тексеру барысында судьяның жүргізуші куәлігінің мерзімі өтіп кеткені анықталған.
Аталған сәтте судьяны әкімшілік жауапкершілікке тарту мүмкін болмаған, өйткені оған судьялық иммунитет қолданылған. Осыған байланысты Бас прокуратура иммунитетті алу үшін мемлекет басшысына жүгінді. Иммунитет алынғаннан кейін ғана әкімшілік іс сотқа жолданды.
Сот шешімімен Әсел Досаева алкогольдік мас күйінде көлік басқарғаны және жүргізуші куәлігі жарамсыз болуы бойынша кінәлі деп танылып, 200 айлық есептік көрсеткіш мөлшерінде, яғни 786 400 теңге көлемінде айыппұл салынды.
Әкімшілік қамау жазасы қолданылған жоқ. Себебі заңнамаға сәйкес, 14 жасқа толмаған баласы бар әйелдерге қамау түріндегі жаза тағайындалмайды.