В Атырау -8 
Кариб бассейнінде АҚШ әскери күштері Венесуэламен байланысты тағы бір мұнай танкерін – Sagitta кемесін – тоқтатты. Бұл соңғы екі айда қолға түскен жетінші танкер болды, деп хабарлайды Евронью́с.
АҚШ-тың Оңтүстік қолбасшылығы операцияны растады.
Танкер Панама туы астында жүзіп жүрген, ешқандай оқыс жағдайсыз ұсталды.
Әскери мәлімдемеде бұл әрекет «АҚШ халқының қауіпсіздігі бәрінен жоғары» екендігін көрсететіні айтылды.
Танкер Sagitta Sunne Co Limited компаниясына тиесілі. Бұл компания санкцияға ілінген бірнеше кемеге иелік етеді және «көлеңкелі флоттың» бөлігі саналады.
АҚШ қаржылық органдарының дерегінше, бұл флот Венесуэла, Иран және Ресей секілді санкциялық елдерден мұнай тасымалдауға арналған.
2025 жылдың 10 желтоқсанынан бері АҚШ Венесуэламен байланысты жеті танкерді тәркілеген: алтауы Кариб теңізінде, біреуі Солтүстік Атлантикада.
Вашингтон Венесуэла мұнайын өз бақылауымен сатып, табыстың бір бөлігін Каракаспен бөлісу схемасын енгізді.
Венесуэланың уақытша президенті Делси Родригес АҚШ-тан алғашқы 300 млн доллар түскенін растады. Бұл қаражат ұлттық банктер арқылы экономикадағы негізгі салаларды қолдауға және инфляция жағдайында халықтың сатып алу қабілетін қорғауға бағытталмақ.
Қаражат Катардағы арнайы қорға орналастырылып, Венесуэла валюталық нарығын тұрақтандыруға жұмсалады.
АҚШ президенті Дональд Трамп Венесуэла басшысы Николас Мадуроға қарсы қатаң шаралар қабылдап отыр. Мадуро мен оның жұбайына АҚШ-та заңсыз есірткі айналымы бойынша айып тағылған, бірақ олар бұл айыптарды жоққа шығарады.