В Атырау -8 
Әуекомпания басшысының жұбайы Татьяна Фостер аты аталған «өз адамдарына билет» дауына байланысты алғаш рет ашық мәлімдеме жасады, деп хабарлайды Ulysmedia.kz.
Жанжал FlyArystan әуе компаниясының бұрынғы қызметкері Ренат Абулхановтың әлеуметтік желіде жариялаған жазбаларынан кейін туындаған. Ол хат алмасулардың скриншоттарын ұсынып, онда Татьяна Фостердің өзі мен анасы үшін ең арзан тарифтерге қолжетімділікті қолмен ашуды сұрағаны айтылған. Абулхановтың сөзінше, мұндай өтініштер «өз адамдарынан» жиі түскен.
Бұл деректер қоғамда кең резонанс тудырды. Желі қолданушылары жеңілдетілген әрі тапшы билеттердің белгілі бір адамдарға ғана берілгеніне наразылық білдірді. Сонымен қатар, кей хат алмасуларда толық жүктелген рейстерге де билеттер рәсімделгені көрсетілген. Айыптау нұсқасына сәйкес, бұл жасанды овербукингке әкеліп, қарапайым жолаушылардың рейске отырғызылмай қалуына себеп болуы мүмкін.
Татьяна Фостер Instagram парақшасында өз отбасына қатысты «жалған ақпарат кеңінен тарап жатқанын» мәлімдеді. Оның айтуынша, ол бұл мәселеге қатысты ұзақ уақыт бойы әдейі пікір білдірмеген.
«Мен қоғамдық пікірталастардан саналы түрде алшақ болып, соттың құқықтық бағасын күтуді жөн көрдім. Фактілерге сүйене отырып, тек сот шешімімен сөйлеуді дұрыс санадым», — деп жазды ол.
Ол бұл жерде ұрлау және ақшаны заңдастыру деректері бойынша қозғалған қылмыстық істі меңзеген. Аталған іс аясында FlyArystan-ның үш бұрынғы менеджері сотталған. Ренат Абулханов пен Еркін Исанов 8,5 жылға, ал Дәурен Еркенұлы 9 жылға бас бостандығынан айырылып, мүліктері тәркіленген.
Алайда Татьяна Фостер мәлімдемесінде қоғамда талқыланып жатқан негізгі айыптауларға нақты жауап бермеген. Атап айтқанда, «өз адамдарына билет» тәжірибесі, арзан тарифтерді жеке тұлғалар үшін ашу, овербукинг салдарынан жолаушылардың рейске отырғызылмауы және авиакомпания басшысының жұбайы ретіндегі мәртебесін пайдаланды деген айыптауларға түсіндірме жасалмаған.
Оның реакциясы сот үкіміне сілтеме жасап, авиакомпания ұстанымын қолдаумен шектелген.