В Атырау -8 
Қазақ КСР Компартиясы ОК-нің бұрынғы бірінші хатшысы Дінмұхаммед Қонаевтың қарындасы, көрнекті ғалым-биолог Рауза Қонаева 92 жасқа қараған шағында дүниеден өтті, деп хабарлайды Arasha.kz.
Қаралы хабарды Дінмұхаммед Ахметұлы Қонаев атындағы Халықаралық қор растады.
Рауза Минлиахмедқызы Қонаева 1934 жылғы 10 сәуірде Алматы облысындағы Шілік ауылында дүниеге келген. Ол Минлиахмед пен Зауре Қонаевтардың кенже перзенті еді. Жасы үлкен бауырларымен арадағы айырмашылық едәуір болған: әпкесі Амина одан 27 жас үлкен болса, ағасы Аскар Минлиахмедұлы бес жасқа үлкен болған.
Марқұм Алматы қаласындағы №28, №10 және №36 мектептерде білім алып, 1952 жылы М.В. Ломоносов атындағы Мәскеу мемлекеттік университетінің биология және топырақтану факультетіне оқуға қабылданды. Ол жоғары оқу орнын 1956 жылы табысты тәмамдаған.
1957 жылдан 2016 жылға дейін Қазақстан Ғылым академиясы жүйесінде үздіксіз еңбек етті. Осы кезеңде Биохимия институтында (1957–1983), сондай-ақ Молекулалық биология және биохимия институтында (1983–2016) ғылыми қызмет атқарды. Оның ғылыми еңбектері Қазақстаннан тысқары елдерде де кеңінен танылды.
Рауза Минлиахмедқызы биология ғылымына сүбелі үлес қосқан ірі ғалым ғана емес, сондай-ақ жоғары мәдениетімен, қарапайым болмысымен, адамгершілігі мен ізгі қарым-қатынасымен ерекшеленген тұлға ретінде көпшіліктің жадында қалды. Ол белгілі заңгер Мұрат Баймахановтың жұбайы болған.
Марқұмның қызы Дина Баймаханова — заң ғылымдарының докторы, әл-Фараби атындағы Қазақ ұлттық университетінің профессоры.