В Атырау 0 
АҚШ Президенті Дональд Трамп әлеуметтік желі Truth Social-да Венесуэла президентінің «уақытша міндетін атқарушы» екенін жариялады, деп хабарлайды Евронью́с.
12 қаңтарда жарияланған жазбада Трамп Википедиядағы жалған бет скриншотын орналастырып, өзін Венесуэланың уақытша басшысы ретінде көрсетті. Ал шынайы энциклопедия бетінде ол тек 2025 жылдан бері АҚШ Президенті ретінде тіркелген.
Жазба 24 мыңнан астам «лайк» жинады. Бұл мәлімдеме Трамптың Венесуэлаға қатысты соңғы айларда жасаған бірқатар сөздерінің жалғасы болды. Бұған дейін, 3 қаңтарда АҚШ арнайы жасағы Каракастағы кешеннен Венесуэла Президенті Николас Мадуро мен оның жұбайын ұстап, Нью-Йоркке жеткізген еді.
Трамп бірнеше рет АҚШ Венесуэланы басқарып, оның мұнай қорларын ұзақ уақыт пайдаланатынын айтқан. The New York Times-қа берген сұхбатында ол Вашингтонның елге бақылауы үш айдан, алты айдан немесе бір жылдан да ұзаққа созылатынын мәлімдеді.
Венесуэланың уақытша президенті ретінде Делси Родригес өз мәлімдемесінде:
«Венесуэланы халық пен оның конституциялық үкіметі басқарады. Президент Николас Мадуро бар, ал ол тұтқында болғанда елді басқару жауапкершілігі маған жүктеледі», — деді.
Каракас АҚШ-пен дипломатиялық миссияларды қалпына келтіру процесін бастағанын жариялады. Родригес басқарған үкімет АҚШ Мемлекеттік департаментінің өкілдері Венесуэлаға келгенін растады және Вашингтонға жауап сапарды қарастырып жатқанын мәлімдеді.
Өткен аптада АҚШ Венесуэлаға тиесілі екі мұнай танкерін әскери-теңіз блокадасын бұзбақ болған кезде қолға түсірді. Бірі Солтүстік Атлантикада, екіншісі Кариб теңізінде ұсталды.
Мадуроны ұстау операциясы Оңтүстік Америка елдерінің басшылары тарапынан сынға ұшырады. Осыдан кейін Трамп аймақтағы басқа мемлекеттерге де қоқан-лоқы жасай бастады.
Fox News арнасына берген сұхбатында ол АҚШ Мексикадағы наркокартельдерге қарсы құрлықтағы операцияларды бастайтынын мәлімдеді. Алайда ол жоспарланған соққылардың мерзімі мен ауқымы туралы нақты ақпарат берген жоқ.