В Атырау +3 
Премьер-министрдің орынбасары – жасанды интеллект және цифрлық даму министрі Жасұлан Мәдиев SpaceX (Starlink) компаниясының өкілдерімен бірге Starlink Direct-to-Cell спутниктік байланыс технологиясын сынақтан өткізді, деп хабарлайды Azattyq Rýhy.
Министрліктің ресми мәліметіне сәйкес, тестілік байланыс сәтті орындалған.
2026 жылдан бастап Қазақстан Direct-to-Cell технологиясын енгізеді
Цифрлық даму министрлігінің дерегінше, Қазақстан әлем бойынша бұл технологияны енгізетін алғашқы елдердің бірі болмақ.
«2026 жылдың ақпан айынан бастап SpaceX компаниясының Direct-to-Cell (D2C) спутниктік байланыс технологиясы кезең-кезеңімен іске қосылады», – деп хабарлады ведомствоның баспасөз қызметі.
Министрлік өкілдері бұл бастама Мемлекет басшысы Қасым-Жомарт Тоқаевтың биыл күзде АҚШ-қа жасаған ресми сапары кезінде қол жеткізілген келісімдердің нәтижесі екенін атап өтті. Сол сапар барысында әлемдік жетекші технологияларды Қазақстанға енгізуге мүмкіндік беретін бірқатар келісімдер жасалған.
Қазақстанда алғаш рет тікелей спутниктік ұялы байланыс сыналды
Министр Мәдиев пен SpaceX инженерлері Орталық Азияда алғаш рет Direct-to-Cell технологиясын практикалық тұрғыда тексерді.
Сынақ барысында қосымша құрылғыларсыз, кәдімгі ұялы телефон арқылы:
– SMS-хабарлама жіберілді;
– мессенджер арқылы қоңырау шалынды.
«Direct-to-Cell технологиясы стандартты мобильді телефонды ешқандай модем немесе антеннасыз тікелей спутникпен байланыстырады. Сол себепті байланыс далада, таулы аймақтарда және шалғай елді мекендерде де жұмыс істейтін болады», – делінген министрлік хабарламасында.
Қызметтердің іске қосылу мерзімі
Технология енгізілгеннен кейін Қазақстанда алдымен:
– SMS-хабарламалар қолжетімді болады.
Келесі кезеңдерде:
– дауыс байланысы,
– интернетке қосылу және өзге де сервистер іске қосылады.
Негізгі қызмет түрлерінің басым бөлігі 2027 жылы толық жұмыс істей бастайды деп жоспарланып отыр.