Қазақстанда жол апаты екі есеге артты: Атырау – ең қауіпті өңір

Қазақстанда жол-көлік оқиғаларының саны күрт өсіп, соңғы екі жылда дерлік екі есеге артты. Сарапшы Марат Шибұтов ресми деректерді талдап, өңірлердегі жағдайдың қатты нашарлағанын айтты.

Апат саны екі есеге жуық өсті

Сарапшының айтуынша, 2024 жылы апаттар 2023 жылмен салыстырғанда шамамен екі есе көбейген. Бұл үрдіс биыл да жалғасуда:

• 2025 жылдың 10 айында – 29 583 жол апаты,

• 22 қарашадағы мәлімет – 31 414 апат,

• жыл соңына дейін бұл көрсеткіш 34 мыңға жетуі мүмкін.

Жараланғандар саны да еселеп артты

Апаттардың жиілеуі зардап шеккендердің күрт көбеюіне алып келді:

• 2023 жылы – 20 мыңға жуық жаралы,

• 2024 жылы – шамамен 40 мың,

• 2025 жылы мұндай деңгейге 10 айдың өзінде жетіп отыр.

Марат Шибұтовтың болжамы бойынша, жыл қорытындысында жараланғандар саны 42–43 мың адамға жетуі мүмкін.

Қаза болғандар азаймаған — жыл сайын 2,5 мың адам

Жол апаттары көбейгенімен, жыл сайынғы өлім көрсеткіші шамамен бір деңгейде қалып отыр — 2 500 адам.

22 қарашадағы жағдай бойынша 2 039 адам қаза тапқан. Жыл соңында бұл сан 2 200 шамасында болады деп күтіледі.

Жол апаты ең көп өскен өңірлер

Ел бойынша орташа өсім — 199%. Бірақ кей өңірлерде жағдай әлдеқайда ауыр.

Апат саны ең қатты артқан алғашқы 5 облыс:

1. Атырау облысы — 372%

2. Қарағанды облысы — 328%

3. Маңғыстау облысы — 295%

4. Қостанай облысы — 273% 

5. Ақтөбе облысы — 273% 

Үш өңірде жол апаты үш есеге көбейген.

Негізгі себептер

ІІМ дерегінше, елдегі жол апаттарының басты себептері:

• жылдамдықты асыру,

• қарсы жолаққа шығу,

• жаяу жүргіншілердің ережені бұзуы.

Шибұтовтың айтуынша, мұндай көрсеткіштер қоғамда кең талқыланып, нақты шаралар қабылдауды қажет етеді.